وزیراعظم شہباز شریف اور بنگلہ دیشی ہم منصب کی ٹیلی فونک گفتگو، باہمی تعاون پر اتفاق

وزیر اعظم شہباز شریف نے بنگلہ دیش کے ہم منصب طارق رحمان کے ساتھ ٹیلی فونک رابطہ کیا ہے۔ اس گفتگو کے دوران دونوں رہنماؤں نے ایک دوسرے کو عید الفطر کی مبارکباد پیش کی اور خطے کی موجودہ صورتحال پر تبادلہ خیال کیا۔

وزیراعظم شہباز شریف نے بنگلہ دیشی ہم منصب اور وہاں کے عوام کے لیے نیک خواہشات کا اظہار کیا۔ انہوں نے اس عزم کا اعادہ کیا کہ پاکستان بنگلہ دیش کے ساتھ اپنے دیرینہ اور برادرانہ تعلقات کو تمام شعبوں میں مزید مستحکم کرنے کا خواہاں ہے۔

بات چیت کے دوران جنوبی ایشیا کی علاقائی صورتحال اور مشرق وسطیٰ میں جاری کشیدگی پر بھی تفصیلی گفتگو کی گئی۔ دونوں رہنماؤں نے اس بات پر اتفاق کیا کہ تنازعات کے حل کے لیے مذاکرات اور سفارتی ذرائع کو بروئے کار لانا ناگزیر ہے۔

بنگلہ دیشی وزیراعظم طارق رحمان نے عید کی مبارکباد کا خیرمقدم کرتے ہوئے پاکستانی عوام کے لیے نیک خواہشات کا پیغام پہنچایا۔ دونوں رہنماؤں نے مستقبل میں علاقائی اور عالمی امن و استحکام کے لیے مل کر کام کرنے کے عزم کا اعادہ کیا۔