صاحبزادہ فرحان آئی سی سی کے فروری کے بہترین کھلاڑی قرار

انٹرنیشنل کرکٹ کونسل نے سری لنکا میں کھیلے گئے ٹی ٹوئنٹی ورلڈ کپ میں شاندار کارکردگی کا مظاہرہ کرنے والے پاکستانی اوپنر صاحبزادہ فرحان کو فروری کا بہترین کھلاڑی قرار دے دیا ہے۔ عالمی کرکٹ باڈی کی جانب سے جاری کردہ اعلامیے کے مطابق صاحبزادہ فرحان نے سات میچوں کی چھ اننگز میں 76.60 کی اوسط سے 383 رنز بنا کر ایونٹ میں سب سے زیادہ رنز بنانے والے بیٹر کا اعزاز حاصل کیا۔

صاحبزادہ فرحان نے 160.25 کے اسٹرائیک ریٹ کے ساتھ بیٹنگ کرتے ہوئے دو سنچریاں اور دو نصف سنچریاں اسکور کیں۔ انہوں نے ٹی ٹوئنٹی ورلڈ کپ کے ایک ایڈیشن میں سب سے زیادہ رنز بنانے کا ویرات کوہلی کا طویل عرصہ قائم رہنے والا ریکارڈ بھی اپنے نام کیا۔ وہ نومبر 2024 میں حارث رؤف کے بعد آئی سی سی پلیئر آف دی منتھ کا اعزاز پانے والے پہلے پاکستانی مرد کھلاڑی ہیں۔

آئی سی سی کی جانب سے جاری کردہ ٹورنامنٹ کی بارہ رکنی ٹیم میں بھی صاحبزادہ فرحان واحد پاکستانی کھلاڑی کے طور پر شامل کیے گئے تھے۔ وہ ٹی ٹوئنٹی ورلڈ کپ کے ایک ہی ایڈیشن میں نمیبیا اور سری لنکا کے خلاف دو سنچریاں اسکور کرنے والے پہلے بیٹر بھی بنے۔ پالی کیلے میں سری لنکا کے خلاف شاندار سنچری کے بعد وہ آئی سی سی ٹی ٹوئنٹی بیٹنگ رینکنگ میں دوسرے نمبر پر آ گئے ہیں۔

اس کے علاوہ انہوں نے فخر زمان کے ساتھ مل کر ٹی ٹوئنٹی انٹرنیشنل کرکٹ میں کسی بھی وکٹ کے لیے 176 رنز کی ریکارڈ شراکت قائم کی۔ اگرچہ پاکستان نے شریک میزبان سری لنکا کے خلاف پانچ رنز سے کامیابی حاصل کی، تاہم نیٹ رن ریٹ کم ہونے کے باعث قومی ٹیم سیمی فائنل کے لیے کوالیفائی نہ کر سکی۔

اس اعزاز پر اپنے ردعمل میں صاحبزادہ فرحان کا کہنا تھا کہ ورلڈ کپ جیسے بڑے اسٹیج پر کارکردگی دکھا کر یہ ایوارڈ جیتنا ایک ناقابل یقین احساس ہے۔ انہوں نے اپنی کامیابی کا سہرا ساتھی کھلاڑیوں کی حمایت اور اعتماد کو قرار دیتے ہوئے مستقبل میں بھی اسی تسلسل کو برقرار رکھنے کے عزم کا اظہار کیا۔

چیئرمین پاکستان کرکٹ بورڈ محسن نقوی نے صاحبزادہ فرحان کو آئی سی سی پلیئر آف دی منتھ کا ایوارڈ جیتنے پر مبارکباد دی ہے۔ محسن نقوی نے کہا کہ فرحان کی کامیابی پاکستان کرکٹ کے لیے باعث فخر ہے اور یہ ان کی سخت محنت اور پیشہ ورانہ رویے کا عکاس ہے۔ انہوں نے امید ظاہر کی کہ فرحان مستقبل میں بھی اپنی کارکردگی میں تسلسل برقرار رکھیں گے۔