توانائی بحران: سندھ حکومت کا اسمارٹ لاک ڈاؤن نافذ کرنے پر غور

صوبائی وزیر ناصر حسین شاہ نے کہا ہے کہ اگر موجودہ جنگی صورتحال طول پکڑتی ہے تو توانائی کے مسائل میں مزید اضافہ ہو سکتا ہے۔ انہوں نے خبردار کیا کہ عالمی سطح پر جاری کشیدگی کے پیش نظر ایندھن کی بچت ناگزیر ہے تاکہ ملک کو کسی بڑے توانائی بحران سے بچایا جا سکے۔

کراچی میں میڈیا سے گفتگو کرتے ہوئے صوبائی وزیر نے بتایا کہ سندھ حکومت توانائی بحران پر قابو پانے کے لیے صوبے میں اسمارٹ لاک ڈاؤن کے نفاذ پر غور کر رہی ہے۔ ان کا کہنا تھا کہ امریکہ، اسرائیل اور ایران کے درمیان جاری کشیدگی کے اثرات عالمی توانائی کی سپلائی پر مرتب ہو رہے ہیں جس کے باعث احتیاطی تدابیر اختیار کرنا وقت کی اہم ضرورت ہے۔

ناصر حسین شاہ نے مزید بتایا کہ توانائی کے تحفظ کے لیے سندھ حکومت نے اپنے سرکاری محکموں کی گاڑیوں کے لیے ایندھن کی فراہمی میں 40 فیصد تک کٹوتی کر دی ہے اور اب ایندھن کا استعمال صرف 60 فیصد تک محدود کر دیا گیا ہے۔ حکومتی سطح پر یہ اقدامات ایندھن کے ذخائر کو محفوظ رکھنے کے لیے اٹھائے جا رہے ہیں۔