لاہور میں وقفے وقفے سے بارش، موسم خوشگوار ہو گیا

محکمہ موسمیات نے پیش گوئی کی ہے کہ آئندہ چوبیس گھنٹوں کے دوران ملک کے بیشتر علاقوں میں موسم خشک اور مطلع جزوی طور پر ابر آلود رہے گا۔

لاہور اور گردونواح میں جمعرات اور جمعہ کی درمیانی شب وقفے وقفے سے ہونے والی بارش اور ٹھنڈی ہواؤں کے باعث موسم خوشگوار ہو گیا ہے۔ بارش کا سلسلہ شملہ پہاڑی، مال روڈ، ڈیوس روڈ، لکشمی چوک، سول سیکرٹریٹ، ساندہ روڈ، چوبرجی اور گلشن راوی سمیت شہر کے مختلف علاقوں میں جاری رہا۔

محکمہ موسمیات کے مطابق بلوچستان کے مغربی اضلاع میں چند مقامات پر تیز ہواؤں اور گرج چمک کے ساتھ بارش کا امکان ہے۔

وفاقی دارالحکومت اسلام آباد اور گردونواح میں موسم خشک اور مطلع جزوی طور پر ابر آلود رہے گا۔ پنجاب، سندھ اور بلوچستان کے دیگر اضلاع میں بھی موسم کی صورتحال خشک رہے گی۔

خیبر پختونخوا کے بیشتر علاقوں میں مطلع جزوی طور پر ابر آلود رہے گا جبکہ کشمیر میں صبح کے اوقات میں کہیں کہیں بارش اور گرج چمک متوقع ہے۔ گلگت بلتستان میں موسم خشک اور مطلع جزوی طور پر ابر آلود رہنے کا امکان ہے۔