آپریشن غضب الحق: افغان میڈیا کا طالبان کو بھاری نقصان پہنچنے کا اعتراف

راولپنڈی سے موصولہ اطلاعات کے مطابق افغان میڈیا نے اعتراف کیا ہے کہ پاک افغان سرحد پر حالیہ جھڑپوں کے دوران افغان طالبان کو پاکستانی سیکیورٹی فورسز کے ہاتھوں عبرتناک شکست کا سامنا کرنا پڑا۔ آپریشن غضب للحق کے دوران پاک فوج کی بھرپور جوابی کارروائی کے نتیجے میں طالبان اپنی سرحدی چوکیاں چھوڑ کر فرار ہونے پر مجبور ہو گئے۔

رپورٹ کے مطابق اپنی شکست کو چھپانے کے لیے طالبان جنگجوؤں نے مساجد میں پناہ لی اور عام شہریوں کا روپ دھار کر علاقے سے انخلا کیا۔ قبائلی عمائدین کا کہنا ہے کہ افغان طالبان اپنی ناکامی اور پسپائی کو چھپانے کے لیے جھوٹے پروپیگنڈے کا سہارا لے رہے ہیں۔

علاقہ مکینوں نے نشاندہی کی ہے کہ طالبان حکومت کی غفلت اور ناکام پالیسیوں کی وجہ سے عوام فاقہ کشی پر مجبور ہیں۔ مقامی آبادی نے اب مدد کے لیے پاکستانی سیکیورٹی فورسز سے رجوع کرنے کا فیصلہ کیا ہے۔

ماہرین دفاع کا کہنا ہے کہ پاکستانی سیکیورٹی فورسز نے سرحد پار سے ہونے والی جارحیت کا منہ توڑ جواب دے کر دشمن کے عزائم کو خاک میں ملا دیا ہے۔ یہ آپریشن اس بات کا واضح ثبوت ہے کہ پاکستان اپنی سرحدوں کے تحفظ کی مکمل صلاحیت رکھتا ہے۔

سیکیورٹی تجزیہ کاروں کے مطابق دہشت گردوں کے ٹھکانوں کو نشانہ بنا کر پاکستان نے یہ پیغام دیا ہے کہ ملک دشمن عناصر کی سرپرستی اب مزید برداشت نہیں کی جائے گی۔