پاکستان کشیدگی کم کرنے کے لیے سہولت کار کا کردار ادا کر رہا ہے: رضوان سعید شیخ

نیویارک میں تعینات پاکستانی سفیر رضوان سعید شیخ نے کہا ہے کہ پاکستان خطے میں کشیدگی کم کرنے کے لیے اپنی دیرینہ روایات کے مطابق سفارتی کوششیں جاری رکھے ہوئے ہے۔

امریکی نشریاتی ادارے این بی سی کے پروگرام میٹ دی پریس سے گفتگو کرتے ہوئے انہوں نے بتایا کہ جنگ بندی اور مذاکراتی عمل کے حوالے سے اعلیٰ سطح پر سفارتی کاوشیں جاری ہیں۔

رضوان سعید شیخ کا کہنا تھا کہ اس سفارتی عمل میں پاکستان کو سعودی عرب، مصر، ترکی اور دیگر شراکت داروں کا تعاون حاصل ہے۔ انہوں نے مزید کہا کہ اسلام آباد میں شروع کیے گئے مذاکراتی عمل میں ایک تعمیری روح کارفرما ہے اور باہمی افہام و تفہیم کے ذریعے ہی مسائل کا حل ممکن ہے۔

پاکستانی سفیر نے واضح کیا کہ پاکستان بنیادی طور پر ایک سہولت کار کا کردار ادا کر رہا ہے جبکہ تصفیہ طلب معاملات کو حل کرنے کی اصل ذمہ داری متعلقہ فریقین پر عائد ہوتی ہے۔

انہوں نے اس بات پر زور دیا کہ پاکستان اور عالمی برادری تنازع کے پرامن حل کے لیے پرامید ہیں اور موجودہ حالات میں سفارت کاری کو اپنی مکمل صلاحیت دکھانے کا موقع ملنا چاہیے۔