پشاور کے علاقے ریگی بائی پاس پر محکمہ انسداد دہشت گردی سی ٹی ڈی نے خفیہ اطلاع پر کارروائی کرتے ہوئے دو دہشت گردوں کو ہلاک کر دیا ہے۔ منگل کے روز ہونے والے اس آپریشن کے دوران دہشت گردوں کی جانب سے فائرنگ کی گئی جس کے جواب میں سی ٹی ڈی اہلکاروں نے جوابی کارروائی کی۔
ترجمان سی ٹی ڈی کے مطابق ہلاک ہونے والے دہشت گردوں کی شناخت عباس اور عثمان کے نام سے ہوئی ہے۔ یہ دونوں دہشت گرد سی ٹی ڈی کانسٹیبل ثناء اللہ کی شہادت میں ملوث تھے اور ان کے قبضے سے شہید کانسٹیبل کا موبائل فون بھی برآمد کر لیا گیا ہے۔
حکام کا کہنا ہے کہ ہلاک دہشت گرد درجنوں مقدمات میں مطلوب تھے۔ ان کی جانب سے کیے گئے مختلف حملوں میں پانچ پولیس اہلکار شہید اور ایک درجن سے زائد زخمی ہوئے تھے۔
آپریشن کے دوران دہشت گردوں کے دیگر ساتھی اندھیرے کا فائدہ اٹھاتے ہوئے فرار ہونے میں کامیاب ہو گئے۔ پولیس کی بھاری نفری نے علاقے کو گھیرے میں لے کر مفرور ملزمان کی گرفتاری کے لیے سرچ آپریشن شروع کر دیا ہے۔
