الیکشن کمیشن آف پاکستان نے وفاقی دارالحکومت میں ورک فرام ہوم کی حکومتی پالیسی کے پیش نظر بیس اپریل دو ہزار چھبیس کو ہونے والی تمام سماعتیں ملتوی کر دی ہیں۔
ترجمان الیکشن کمیشن کے مطابق بیس اپریل کے لیے مقرر کردہ تمام کیسز کو ڈی لسٹ کر دیا گیا ہے جن کی نئی تاریخوں کا اعلان بعد میں کیا جائے گا۔ متعلقہ فریقین کو اس تبدیلی سے جلد آگاہ کر دیا جائے گا۔
یہ فیصلہ وفاقی حکومت کی جانب سے اسلام آباد کے ریڈ زون میں ورک فرام ہوم کے احکامات کی روشنی میں کیا گیا ہے۔ ریڈ زون میں اہم وزارتیں، ڈویژنز اور دیگر وفاقی دفاتر واقع ہیں۔
کابینہ ڈویژن کے نوٹیفکیشن کے مطابق ریڈ زون کے تمام دفاتر کا عملہ بیس اپریل کو گھر سے کام کرے گا۔ تاہم افسران اور ضروری عملے کو اپنے اسٹیشنوں پر موجود رہنے کی ہدایت کی گئی ہے تاکہ ضرورت پڑنے پر فوری طور پر دفتر طلب کیے جانے کی صورت میں وہ رپورٹ کر سکیں۔
