کراچی میں گرین لائن بس سروس کے ٹکٹنگ سسٹم میں تکنیکی خرابی کے باعث مسافروں سے زائد کرایہ وصول کیے جانے کا انکشاف ہوا ہے۔ بدھ کے روز سامنے آنے والی شکایات کے مطابق جدید بس سروس کے عملے کی جانب سے سرکاری طور پر مقرر کردہ نرخوں سے زیادہ پیسے وصول کیے جا رہے ہیں۔
مختلف اسٹیشنوں پر موجود مسافروں کا کہنا ہے کہ آن لائن سسٹم میں خرابی کے بہانے ان سے اضافی رقم لی جا رہی ہے۔ سرکاری طور پر ٹکٹ کی قیمت 55 روپے مقرر ہے تاہم عملہ مسافروں سے 60 روپے وصول کر رہا ہے جس میں فی ٹکٹ 5 روپے کا غیر قانونی اضافہ شامل ہے۔
بس سروس کے نیٹ ورک پر پھیلے ہوئے مختلف اسٹیشنوں پر مسافروں کی جانب سے شدید احتجاج اور شکایات کا سلسلہ جاری ہے۔ متاثرہ شہریوں نے حکام سے مطالبہ کیا ہے کہ فوری طور پر تکنیکی نقائص کو دور کر کے زائد وصولی کا عمل روکا جائے اور ذمہ داروں کا تعین کیا جائے۔
