خیرپور کے نواحی علاقے سعید لاکو گاؤں میں پولیس کے ڈرون آپریشن کے دوران دو بچوں سمیت تین افراد ہلاک ہو گئے۔ حکام اور مقامی ذرائع کے مطابق یہ واقعہ جمعرات کے روز پیش آیا۔
پولیس کا کہنا ہے کہ مذکورہ ڈرون علاقے میں مبینہ ڈاکوؤں کے ٹھکانوں کو نشانہ بنانے کے لیے استعمال کیا گیا تھا۔ ذرائع کے مطابق ڈرون حملے کے نتیجے میں تین افراد جان کی بازی ہار گئے جن میں دو بچے بھی شامل ہیں۔ واقعے کی شفاف تحقیقات کے لیے اقدامات کیے جا رہے ہیں تاکہ حقائق کا تعین کیا جا سکے۔
افسوسناک واقعے کے بعد دھاریجہ برادری کے افراد نے شدید احتجاج کرتے ہوئے قومی شاہراہ کو ہر قسم کی ٹریفک کے لیے بند کر دیا جس کے باعث مسافروں کو شدید مشکلات کا سامنا ہے۔
مظاہرین کا مطالبہ ہے کہ واقعے کی شفاف تحقیقات کی جائیں اور ذمہ داران کے خلاف فوری قانونی کارروائی عمل میں لائی جائے۔ حکام کا کہنا ہے کہ صورتحال پر قابو پانے اور ٹریفک کی روانی بحال کرنے کے لیے کوششیں جاری ہیں۔
