پاکستان انٹرنیشنل ایئر لائنز نے لاہور سے حج آپریشن کا باقاعدہ آغاز کر دیا ہے اور عازمینِ حج کو لے کر پہلی پرواز مدینہ منورہ کے لیے روانہ ہو گئی۔
علامہ اقبال انٹرنیشنل ایئرپورٹ سے پی آئی اے کی پرواز پی کے 747 نے 310 عازمین کو لے کر اڑان بھری۔ ابتدائی مرحلے میں تمام حج پروازیں براہ راست مدینہ منورہ پہنچیں گی۔
ذرائع کے مطابق لاہور سے 34 خصوصی حج پروازوں کے ذریعے مجموعی طور پر 12 ہزار سے زائد عازمین فریضہ حج کی ادائیگی کے لیے سعودی عرب روانہ ہوں گے۔
ایئرپورٹ پر منعقدہ ایک پروقار تقریب کے دوران پی آئی اے کے اسٹیشن منیجر اشفاق اعوان، ڈسٹرکٹ منیجر واجد سلیم اور دیگر اعلیٰ حکام نے عازمین کو رخصت کیا۔ اس موقع پر قومی ایئر لائن کی جانب سے حجاج کرام میں چھتریاں بھی تقسیم کی گئیں۔
