وفاقی دارالحکومت اسلام آباد میں انتظامیہ نے پبلک اور مال بردار ٹرانسپورٹ کے داخلے پر عائد پابندیاں نرم کر دی ہیں جس کے بعد شہر میں نقل و حمل کا عمل بحال ہونا شروع ہو گیا ہے۔ سرکاری اعلامیے کے مطابق شہر بھر کے تمام بس ٹرمینلز کھول دیے گئے ہیں تاہم فیض آباد بس ٹرمینل تاحکم ثانی بند رہے گا۔
انتظامیہ کی جانب سے توانائی کی بچت اور کفایت شعاری کے پیش نظر کاروباری مراکز کے اوقات کار میں بھی ردوبدل کیا گیا ہے۔ جاری کردہ نوٹیفکیشن کے تحت دکانیں، مارکیٹیں اور شاپنگ مالز اب رات آٹھ بجے بند کر دیے جائیں گے۔ تاہم طبی مراکز، فارمیسی، پیٹرول پمپ، سی این جی اسٹیشنز اور دودھ کی دکانوں کو ان پابندیوں سے استثنیٰ حاصل ہوگا۔
کھانے پینے کے مراکز کے لیے اوقات کار میں کچھ نرمی کی گئی ہے۔ ریسٹورنٹس، تندور اور کریانہ اسٹورز رات دس بجے تک کھلے رہ سکیں گے جبکہ فوڈ ڈیلیوری اور ٹیک اوے کی سہولت رات دس بجے کے بعد بھی بلا تعطل جاری رہے گی۔
شادی ہالز، مارکیز اور دیگر تقریبات کے مقامات بھی رات دس بجے تک بند کرنا لازمی ہوں گے۔ کھیلوں کے مراکز، کلب اور جم بھی اسی وقت کے پابند ہوں گے۔ ضلعی انتظامیہ نے تاجر برادری اور شہریوں پر زور دیا ہے کہ وہ نئے اوقات کار پر مکمل عمل درآمد یقینی بنائیں تاکہ توانائی کی بچت کے حکومتی اہداف حاصل کیے جا سکیں۔
