اسلام آباد میں پیر کے روز نائب وزیراعظم اور وزیر خارجہ سینیٹر محمد اسحاق ڈار کی زیر صدارت ایک اعلیٰ سطحی اجلاس منعقد ہوا جس میں خطے کی تازہ ترین صورتحال اور بدلتے ہوئے علاقائی حالات کا تفصیلی جائزہ لیا گیا۔
ترجمان دفتر خارجہ کے مطابق اجلاس میں سیکرٹری خارجہ آمنہ بلوچ اور وزارت خارجہ کے سینئر حکام نے شرکت کی۔ شرکاء نے خطے میں امن و امان کی صورتحال اور درپیش چیلنجز پر تبادلہ خیال کیا۔
اجلاس کے دوران نائب وزیراعظم اور وزیر خارجہ اسحاق ڈار نے اس عزم کا اعادہ کیا کہ پاکستان خطے میں امن اور استحکام کے فروغ کے لیے اپنا تعمیری کردار ادا کرنا جاری رکھے گا۔ انہوں نے زور دیا کہ علاقائی مسائل کے حل کے لیے بات چیت اور سفارت کاری کا راستہ اختیار کرنا ناگزیر ہے۔
