لاہور (ویب ڈیسک) پاکستان پیپلز پارٹی لیبر بیورو کے صدر چوہدری منظور احمد نے مطالبہ کیا ہے کہ تمام مزدوروں کی نادرا کے ساتھ فوری رجسٹریشن کو یقینی بنایا جائے اور شفافیت کے لیے تنخواہوں کی ادائیگی بینک کھاتوں کے ذریعے کی جائے۔
پیپلز پارٹی لاہور کے زیر اہتمام لیبر ڈے کے موقع پر منعقدہ سیمینار سے خطاب کرتے ہوئے انہوں نے نجکاری کے عمل کو کڑی تنقید کا نشانہ بنایا۔ چوہدری منظور احمد نے نجکاری کو کھلی لوٹ مار قرار دیتے ہوئے عزم ظاہر کیا کہ مزدور تنظیمیں اس کے خلاف اپنی مزاحمت جاری رکھیں گی۔
سیمینار سے پیپلز پارٹی لاہور کی جنرل سیکرٹری ڈاکٹر عائشہ شوکت، آرگنائزنگ کمیٹی کے کنوینر مجید غوری، پیپلز پارٹی لاہور کی صدر نرگس خان اور مزدور فورم پی پی پی لاہور کی صدر ماہ گل عباس نے بھی خطاب کیا۔
چوہدری منظور احمد نے زرعی شعبے کی صورتحال پر تشویش کا اظہار کرتے ہوئے الزام عائد کیا کہ اسے کمزور کیا جا رہا ہے تاکہ سستی لیبر پیدا کی جا سکے۔ انہوں نے انکشاف کیا کہ پنجاب میں ورک فورس کی بڑی تعداد کے باوجود سوشل سیکیورٹی کے تحت صرف بائیس لاکھ مزدور رجسٹرڈ ہیں۔
سابق وزیراعظم ذوالفقار علی بھٹو شہید کو خراج تحسین پیش کرتے ہوئے انہوں نے کہا کہ بھٹو دور میں کیے گئے اصلاحاتی اقدامات کا مقصد مزدوروں کو بااختیار بنانا تھا، جس کے تحت سابقہ لیبر قوانین نے غیر رسمی شعبے کے مزدوروں کو بھی حقوق فراہم کیے۔
