اسلام آباد ٹریفک پولیس نے مارکہ حق تقریبات کے پیش نظر شہر میں ٹریفک کا خصوصی پلان جاری کر دیا ہے۔ اس پلان کے تحت دس مئی کو شام چھ بجے سے رات بارہ بجے تک اہم شاہراہوں پر ٹریفک کے داخلے کے راستے تبدیل رہیں گے۔
ترجمان کے مطابق سرینگر ہائی وے کو کورین والا چوک سے پشاور موڑ تک بند رکھا جائے گا جبکہ فیض آباد سے خیابان چوک تک ایکسپریس وے اور فیصل ایونیو بھی ٹریفک کے لیے بند رہیں گے۔ موٹر وے سے مری جانے والے مسافروں کو نائنتھ ایونیو اور کرنل شیر خان روڈ استعمال کرنے کی ہدایت کی گئی ہے جبکہ مری اور بھارہ کہو سے موٹر وے جانے والے شہری مری روڈ اور آئی جے پی روڈ کا انتخاب کریں۔
ریڈ زون اور راولپنڈی کے درمیان سفر کرنے والوں کو مارگلہ روڈ یا جناح ایونیو استعمال کرنے کی ہدایت دی گئی ہے۔ راولپنڈی سے اسلام آباد آنے والے شہریوں کے لیے فقیرِ اعظم روڈ اور نائنتھ ایونیو کے متبادل راستے تجویز کیے گئے ہیں۔
مری سے راوت جانے والے مسافر پارک روڈ اور لہتراڑ روڈ استعمال کریں جبکہ پشاور موڑ سے راوت جانے والی ٹریفک نائنتھ ایونیو، اسٹیڈیم روڈ اور راول روڈ سے گزر سکے گی۔ لائٹ ٹرانسپورٹ گاڑیوں کو شام پانچ بجے سے رات بارہ بجے تک راوت سے راولپنڈی کی جانب موڑا جائے گا۔
دس مئی کو صبح چار بجے سے رات بارہ بجے تک شہر میں ہیوی ٹریفک کے داخلے پر مکمل پابندی عائد رہے گی۔
