متحدہ قومی موومنٹ پاکستان کے چیئرمین خالد مقبول صدیقی نے کہا ہے کہ معرکہ حق میں شکست کے بعد بھارت آج خطے میں کہیں نظر نہیں آتا۔ انہوں نے اپنے ایک بیان میں کہا کہ بھارت نے ہم پر جنگ مسلط کی تھی جس کا پاک فوج نے جرات مندی سے جواب دیا۔
خالد مقبول صدیقی کا کہنا تھا کہ بھارت آج دنیا بھر میں تماشا بن چکا ہے، جبکہ معرکہ حق کے بعد پاکستان سفارتی محاذ پر بھی مسلسل کامیابیاں حاصل کر رہا ہے۔ انہوں نے مزید کہا کہ آج پاکستان خطے میں ایک ثالث کا کردار ادا کر رہا ہے۔
قوم 8 مئی 2025 کو بھارت کی جانب سے مسلط کردہ جنگ میں فتح کا جشن منا رہی ہے۔ کراچی سے خیبر اور کشمیر سے گوادر تک معرکہ حق کی تاریخی فتح کے سلسلے میں تقریبات کا انعقاد کیا گیا۔ آزاد کشمیر، پنجاب، سندھ، بلوچستان، خیبر پختونخوا اور گلگت بلتستان میں خصوصی پروگرام منعقد کیے گئے۔
دشمن نے پاکستان پر بلا اشتعال حملہ کیا تھا جس کا جواب آپریشن بنیان مرصوص کے ذریعے بھرپور انداز میں دیا گیا۔ یہ آپریشن معرکہ حق کی تاریخ میں ایک اہم سنگ میل کی حیثیت رکھتا ہے جو قومی عزم، عسکری قوت اور اسٹریٹجک پختگی کی عکاسی کرتا ہے۔
اس اہم جنگ میں کامیابی نے قومی اعتماد کو مضبوط کیا اور پاکستان کو ایک ذمہ دار اور مستحکم علاقائی قوت کے طور پر اجاگر کیا۔ اس موقع پر ملک بھر کے شہریوں نے پاک فوج سے اظہار یکجہتی اور تشکر کا اظہار کیا۔ عوام نے ریلیوں، سیمینارز اور چراغاں کے ذریعے مسلح افواج کی بہادری اور مہارت کو خراج تحسین پیش کیا۔
