کراچی میں منشیات کے مکروہ دھندے میں ملوث مبینہ ملزمہ انمول عرف پنکی کی گرفتاری کے بعد ایک نئی آڈیو کلپ منظر عام پر آ گئی ہے جس نے سیکیورٹی اداروں کو چیلنج کر دیا ہے۔ اس آڈیو میں ملزمہ کو قانون نافذ کرنے والے اداروں کو للکارتے اور اپنے غیر قانونی کاروبار پر فخر کرتے ہوئے سنا جا سکتا ہے۔
مبینہ آڈیو ریکارڈنگ میں ملزمہ کا کہنا ہے کہ کراچی بھر میں ان کا نیٹ ورک کھلے عام کام کر رہا ہے اور اگر ہمت ہے تو ادارے انہیں روک کر دکھائیں۔ ملزمہ کے لہجے میں واضح تکبر اور گرفتاری سے خوفزدہ نہ ہونے کا تاثر نمایاں ہے۔
ریکارڈنگ میں ملزمہ نے غیر قانونی منشیات کے کاروبار میں اپنی ایک الگ پہچان بنانے کا دعویٰ کیا ہے۔ اس دوران انہوں نے گولڈن اسٹاک کا تذکرہ بھی کیا ہے جس کے بارے میں خدشہ ظاہر کیا جا رہا ہے کہ یہ مہنگی اور خطرناک منشیات کی ترسیل سے متعلق کوئی خفیہ کوڈ ہے۔
آڈیو میں یہ دعویٰ بھی کیا گیا ہے کہ برسوں گزر جانے کے باوجود انہیں کوئی گرفتار نہیں کر سکا جس سے ان کی جانب سے طویل عرصے سے جاری غیر قانونی سرگرمیوں کا عندیہ ملتا ہے۔ یہ گفتگو قانون نافذ کرنے والے اداروں کی کارکردگی پر بھی سوالیہ نشان اٹھاتی ہے۔
ادھر انمول عرف پنکی کی گرفتاری کے بعد انہیں جوڈیشل ریمانڈ پر کراچی جیل منتقل کر دیا گیا ہے۔ پولیس کا موقف ہے کہ ملزمہ بڑے شہروں میں مصنوعی منشیات کی فراہمی کے ایک وسیع نیٹ ورک کی مرکزی کردار ہے۔
اگرچہ حکام کی جانب سے اس آڈیو کلپ کی باضابطہ تصدیق نہیں کی گئی ہے تاہم اس کے وائرل ہونے کے بعد تحقیقات کا دائرہ کار مزید وسیع کر دیا گیا ہے۔ تفتیشی ادارے اب ڈیجیٹل شواہد کا جائزہ لے رہے ہیں تاکہ منشیات کے اس نیٹ ورک کے تمام کرداروں اور ان کے طریقہ واردات کو بے نقاب کیا جا سکے۔
