بحر الکاہل کے مغربی حصے میں واقع امریکی جزائر بشمول گوام شدید ترین سمندری طوفان سنلاکُو کی زد میں ہیں۔ ماہرین موسمیات نے خبردار کیا ہے کہ یہ رواں سال کا اب تک کا طاقتور ترین طوفان ہے جو آئندہ اڑتالیس گھنٹوں کے دوران تباہ کن ہواؤں اور وسیع پیمانے پر سیلابی صورتحال کا سبب بن سکتا ہے۔
گوام میں قائم نیشنل ویدر سروس کے مطابق سپر ٹائفون سنلاکُو پیر کی صبح مغرب شمال مغرب کی جانب ماریانا جزائر کے سلسلے کی طرف بڑھ رہا تھا۔ اس طوفان کی رفتار 175 میل فی گھنٹہ تک ریکارڈ کی گئی ہے جبکہ اتوار کے روز اس کی شدت 180 میل فی گھنٹہ تک پہنچ گئی تھی۔ ماہرین کا کہنا ہے کہ یہ 2026 کا اب تک کا سب سے طاقتور طوفان ہے۔
موسمیاتی ادارے نے روٹا، ٹینین اور سائپن کے جزائر کے لیے ٹائفون کی وارننگ جاری کر دی ہے، جبکہ گوام، پیگن اور الاماگن کے لیے ٹروپیکل سٹارم وارننگ نافذ کی گئی ہے۔ اس کے علاوہ ایگریہان جزیرے کے لیے ٹروپیکل سٹارم واچ اور گوام کے لیے ٹائفون واچ جاری کی گئی ہے۔
حکام نے گوام میں شہریوں کو گھروں کے اندر رہنے اور سمندری حدود سے دور رہنے کی سخت ہدایت کی ہے۔ گوام کے جوائنٹ انفارمیشن سینٹر نے ایک ایڈوائزری میں کہا ہے کہ اگرچہ طوفانی ہواؤں کا خطرہ کچھ کم ہوا ہے تاہم یہ اب بھی ایک سنگین موسمی صورتحال ہے۔ پیر کی رات سے بدھ کے دوران گوام میں 39 سے 73 میل فی گھنٹہ کی رفتار سے ہوائیں چلنے کا امکان ہے۔
ماریانا جزائر 15 چھوٹے جزائر پر مشتمل ایک مجموعہ ہے جو فلپائن سے تقریباً 1500 میل مشرق میں واقع ہے اور امریکی زیر انتظام ہے۔ ماہرین کے مطابق اگرچہ طوفان کے ٹینین اور سائپن کے قریب سے گزرنے سے قبل اس کی شدت میں کمی متوقع ہے، تاہم اس کے باوجود یہ کیٹیگری چار یا پانچ کے طوفان جیسی تباہی لانے کی صلاحیت رکھتا ہے۔
