پوپ لیو نے امریکی صدر ڈونلڈ ٹرمپ کے ساتھ اپنے حالیہ تنازع کو کم کرنے کی کوشش کرتے ہوئے کہا ہے کہ ان کے افریقی دورے کے دوران سامنے آنے والی رپورٹس تمام پہلوؤں سے درست نہیں ہیں۔
انگولا روانگی کے دوران صحافیوں سے گفتگو کرتے ہوئے پوپ لیو کا کہنا تھا کہ کیمرون میں ان کا یہ بیان کہ دنیا کو چند آمروں نے تباہ کر دیا ہے، ڈونلڈ ٹرمپ کے خلاف نہیں تھا۔ انہوں نے وضاحت کی کہ یہ تقریر دو ہفتے قبل تیار کی گئی تھی، یعنی صدر ٹرمپ کی جانب سے ان کے امن پیغام پر تبصرہ کرنے سے کافی پہلے۔
امریکی نائب صدر جے ڈی وینس نے پوپ کے اس بیان کا خیرمقدم کیا ہے۔ سماجی رابطے کی ویب سائٹ ایکس پر اپنے پیغام میں انہوں نے کہا کہ وہ پوپ لیو کے اس مؤقف کے شکر گزار ہیں۔ وینس کے مطابق میڈیا اکثر تنازعات کو ہوا دیتا ہے جبکہ حقیقت اس سے کہیں زیادہ پیچیدہ ہوتی ہے۔
یاد رہے کہ اتوار کے روز ڈونلڈ ٹرمپ نے سوشل میڈیا پر پوپ لیو کو خارجہ پالیسی اور جرائم کے معاملے پر کمزور قرار دیا تھا۔ ٹرمپ نے ایک مصنوعی ذہانت سے تیار کردہ تصویر بھی شیئر کی تھی جس میں وہ خود کو یسوع مسیح جیسے روپ میں دکھا رہے تھے، جس پر مذہبی حلقوں کی جانب سے شدید تنقید کی گئی اور بعد ازاں یہ پوسٹ ہٹا دی گئی۔
یہ کشیدگی ایران کے خلاف امریکی اسرائیلی جنگ پر پوپ لیو کی جانب سے کی جانے والی تنقید کے بعد پیدا ہوئی۔ پوپ لیو نے پیر کے روز خبر رساں ادارے رائٹرز سے گفتگو میں اس بات کا اعادہ کیا تھا کہ وہ جنگ کے خلاف اپنی آواز بلند کرتے رہیں گے۔
پوپ لیو نے واضح کیا کہ ان کا مقصد امریکی صدر سے بحث کرنا ہرگز نہیں ہے۔ شکاگو سے تعلق رکھنے والے پوپ لیو نے اپنے دورہ افریقہ کے دوران جنگ، عدم مساوات اور عالمی رہنماؤں کے خلاف ایک جارحانہ انداز اپنایا ہے۔ ان کا یہ دورہ تاریخ کے مشکل ترین دوروں میں سے ایک ہے جس میں وہ چار ممالک کے گیارہ شہروں کا دورہ کر رہے ہیں اور اٹھارہ پروازوں کے ذریعے اٹھارہ ہزار کلومیٹر کا فاصلہ طے کریں گے۔
