وزیر اعظم شہباز شریف نے ایرانی صدر مسعود پزشکیان سے ٹیلی فونک رابطہ کیا ہے جس میں خطے میں قیام امن اور سیکیورٹی کی صورتحال پر تفصیلی تبادلہ خیال کیا گیا۔ دونوں رہنماؤں کے درمیان یہ گفتگو تقریباً پینتالیس منٹ تک جاری رہی۔
یہ رابطہ ایسے وقت میں ہوا ہے جب امریکی صدر ڈونلڈ ٹرمپ نے ایران اور امریکہ کے درمیان مذاکرات کے نئے دور کی تصدیق کی ہے اور کہا ہے کہ امریکی نمائندے مشرق وسطیٰ کے بحران کے حل کے لیے مذاکرات کے دوسرے مرحلے کے سلسلے میں جلد اسلام آباد کا دورہ کریں گے۔
وزیر اعظم آفس کے اعلامیے کے مطابق شہباز شریف نے ایرانی قیادت کا شکریہ ادا کیا کہ انہوں نے گیارہ اور بارہ اپریل کو اسلام آباد میں ہونے والے مذاکرات کے لیے محمد باقر قالیباف اور عباس عراقچی کی قیادت میں اعلیٰ سطح کا وفد پاکستان بھیجا تھا۔
وزیر اعظم نے کہا کہ سعودی عرب، قطر اور ترکی کی قیادت کے ساتھ حالیہ رابطے خطے میں پائیدار مذاکرات اور سفارت کاری کے لیے اتفاق رائے پیدا کرنے میں انتہائی مددگار ثابت ہوئے ہیں۔ انہوں نے اس عزم کا اعادہ کیا کہ پاکستان اپنے شراکت داروں کے تعاون سے علاقائی امن اور سلامتی کے فروغ کے لیے پرعزم ہے۔
شہباز شریف نے آرمی چیف جنرل عاصم منیر کے حالیہ دورہ تہران کے دوران ایرانی قیادت کے ساتھ ہونے والی بات چیت پر بھی شکریہ ادا کیا اور ایرانی سپریم لیڈر کے لیے نیک خواہشات کا اظہار کیا۔
ایرانی صدر مسعود پزشکیان نے امن کے لیے پاکستان کی کوششوں کو سراہا۔ انہوں نے اس یقین کا اظہار کیا کہ آنے والے دنوں میں ایران اور پاکستان کے مابین تعلقات مزید مستحکم ہوں گے۔
