صوبہ خیبر پختونخوا کے ضلع خیبر میں سکیورٹی فورسز اور قانون نافذ کرنے والے اداروں نے ایک مشترکہ انٹیلی جنس بیسڈ آپریشن کے دوران 22 دہشت گردوں کو ہلاک کر دیا۔ پاک فوج کے شعبہ تعلقات عامہ آئی ایس پی آر کے مطابق ہلاک ہونے والے دہشت گرد بھارت کے آلہ کار فتنہ الخوارج سے تعلق رکھتے تھے۔
آپریشن کے دوران شدید فائرنگ کے تبادلے کے بعد سکیورٹی فورسز نے مہارت کا مظاہرہ کرتے ہوئے 22 خوارج کو جہنم واصل کیا۔ آئی ایس پی آر کے اعلامیے میں بتایا گیا کہ دہشت گردوں نے زندہ پکڑے جانے کے خوف سے اندھا دھند فائرنگ کی جس کے نتیجے میں ایک دس سالہ معصوم بچہ شہید ہو گیا۔ ہلاک ہونے والے دہشت گردوں کے قبضے سے اسلحہ اور گولہ بارود بھی برآمد کر لیا گیا۔ یہ عناصر علاقے میں دہشت گردی کی متعدد کارروائیوں میں ملوث تھے۔
علاقے میں کسی بھی باقی ماندہ خارجی کی موجودگی کو ختم کرنے کے لیے سرچ آپریشن جاری ہے۔ وفاقی ایپکس کمیٹی برائے نیشنل ایکشن پلان کے ویژن عزم استحکام کے تحت سکیورٹی فورسز کی انسداد دہشت گردی مہم پوری قوت کے ساتھ جاری رہے گی تاکہ غیر ملکی حمایت یافتہ دہشت گردی کے خاتمے کو یقینی بنایا جا سکے۔
صدر مملکت آصف علی زرداری اور وزیراعظم شہباز شریف نے سکیورٹی فورسز کی کارروائی کو سراہتے ہوئے دہشت گردوں کی ہلاکت پر خراج تحسین پیش کیا ہے۔ اپنے الگ الگ بیانات میں دونوں رہنماؤں نے ملک سے دہشت گردی کے مکمل خاتمے تک جنگ جاری رکھنے کے عزم کا اعادہ کیا۔
صدر آصف علی زرداری نے کہا کہ دہشت گرد خطے میں دیرپا امن کے لیے پاکستان کی کوششوں کو سبوتاژ کرنے کی ناکام کوشش کر رہے ہیں۔ انہوں نے آپریشن کے دوران دس سالہ بچے کی شہادت پر گہرے دکھ اور لواحقین سے تعزیت کا اظہار کرتے ہوئے کہا کہ ہم دہشت گردی کو شکست دیں گے اور عالمی امن کے قیام میں اپنا قائدانہ کردار ادا کرتے رہیں گے۔
وزیراعظم شہباز شریف نے بھی بچے کی شہادت پر افسوس کا اظہار کرتے ہوئے کہا کہ دہشت گردوں کی جانب سے اپنی جان بچانے کے لیے کی گئی بزدلانہ فائرنگ انسانیت کے خلاف ناقابل تلافی جرم ہے۔ انہوں نے سوگوار خاندان کے لیے صبر کی دعا کی اور دہشت گردی کے اس واقعے کی شدید مذمت کی۔
