غزہ میں جاری اسرائیلی جارحیت کے نتیجے میں شہید ہونے والے فلسطینیوں کی تعداد 72 ہزار 500 سے تجاوز کر گئی ہے۔ محکمہ صحت کے حکام کے مطابق اکتوبر 2023 سے شروع ہونے والی اس جنگ میں انسانی المیہ سنگین صورت اختیار کر چکا ہے۔
منگل کے روز غزہ کی پٹی میں اسرائیلی حملوں کے دوران ایک نو سالہ بچے عادل النجار سمیت پانچ فلسطینی شہید ہو گئے۔ طبی ذرائع کے مطابق جنوبی غزہ کے علاقے خان یونس میں اسرائیلی ڈرون حملے میں عادل النجار کو نشانہ بنایا گیا۔ مقتول کے لواحقین کا کہنا ہے کہ بچہ کھانا پکانے کے لیے گتے اکٹھے کر رہا تھا کیونکہ علاقے میں بجلی کی طویل بندش اور ایندھن کی شدید قلت کے باعث کھانا پکانا ناممکن ہو چکا ہے۔
ادھر غزہ سٹی میں بھی اسرائیلی فضائی حملے میں ایک گاڑی کو نشانہ بنایا گیا جس کے نتیجے میں چار افراد لقمہ اجل بن گئے۔ اسرائیلی فوج نے ان کارروائیوں کا دفاع کرتے ہوئے دعویٰ کیا ہے کہ خان یونس میں نشانہ بننے والا شخص اسرائیلی فوجیوں کے لیے خطرہ تھا اور غزہ سٹی میں ہلاک ہونے والے افراد دہشت گرد تھے، تاہم قابض فوج نے اپنے دعووں کے حق میں کوئی ثبوت فراہم نہیں کیا۔
ناصر ہسپتال کے مردہ خانے میں نو سالہ عادل النجار کی میت دیکھ کر لواحقین دھاڑیں مار کر روتے رہے۔ مقتول کے رشتہ دار صہیب النجار نے جذباتی انداز میں سوال کیا کہ کیا یہ شرمناک نہیں کہ ہم ہر روز اپنے بچوں کو اپنی آنکھوں کے سامنے دفن کر رہے ہیں۔ انہوں نے کہا کہ ان کے دل ان معصوم بچوں کی موت پر ٹکڑے ٹکڑے ہو رہے ہیں۔
اکتوبر 2025 میں جنگ بندی کے معاہدے کے باوجود اسرائیلی حملوں کا سلسلہ تھم نہ سکا، جس کے بعد سے اب تک 800 سے زائد فلسطینی شہید ہو چکے ہیں۔ اسی عرصے کے دوران اسرائیلی فوج کے مطابق چار فوجی بھی ہلاک ہوئے ہیں۔ اسرائیل اور حماس ایک دوسرے پر جنگ بندی کی خلاف ورزیوں کا الزام عائد کر رہے ہیں۔
واضح رہے کہ سات اکتوبر 2023 کو حماس کے حملوں میں 1200 اسرائیلی ہلاک ہوئے تھے، جس کے بعد سے غزہ میں شروع ہونے والی تباہ کن جنگ نے اب تک 72 ہزار 500 سے زائد فلسطینیوں کی جان لے لی ہے۔
