سعودی عرب نے حج کے لیے عمر کی نئی حد مقرر کر دی ہے جس کے تحت 15 سال سے کم عمر کے عازمین حج کی ادائیگی کے لیے سفر نہیں کر سکیں گے۔ پاکستان کے ایوی ایشن حکام نے اس فیصلے پر فوری عمل درآمد کے احکامات جاری کر دیے ہیں۔
نئی ہدایات کے مطابق وہ عازمین جو 27 مئی 2026 تک 15 برس کی عمر مکمل نہیں کر سکیں گے، انہیں حج پر جانے کی اجازت نہیں ہوگی۔
پاکستان ایئرپورٹس اتھارٹی کی جانب سے جاری کردہ اعلامیے میں کہا گیا ہے کہ 15 سال سے کم عمر کے عازمین کے جاری کردہ حج ویزے منسوخ کر دیے گئے ہیں۔ ملک بھر کے تمام ہوائی اڈوں پر عملے کو ہدایت کی گئی ہے کہ وہ ایسے مسافروں کو پروازوں میں سوار ہونے سے روکیں۔
حکام نے واضح کیا ہے کہ متاثرہ عازمین کو ان کی رقوم کی مکمل واپسی یقینی بنائی جائے گی، جس کی یقین دہانی سعودی حکام کی جانب سے کرائی گئی ہے۔
اس حکم نامے کا نفاذ فوری طور پر شروع کر دیا گیا ہے اور پاکستان کے تمام ایئرپورٹس پر اس کی سخت تعمیل کو یقینی بنانے کی ہدایت کی گئی ہے۔
