واشنگٹن میں امریکی فضائیہ نے نارتھروپ گرومین سسٹمز کارپوریشن کو 488 ملین ڈالر کا ایک اہم معاہدہ تفویض کیا ہے۔ یہ معاہدہ فارن ملٹری سیلز پروگرام کے تحت ایف سولہ طیاروں کے ریڈار سسٹمز کے لیے تکنیکی اور انجینئرنگ معاونت فراہم کرنے کے لیے کیا گیا ہے، جس سے پاکستان سمیت متعدد ممالک مستفید ہوں گے۔
معاہدے کے تحت اے پی جی 66 اور اے پی جی 68 ریڈار سسٹمز کی دیکھ بھال اور تکنیکی معاونت کا کام انجام دیا جائے گا۔ اس منصوبے پر کام میری لینڈ کے علاقے لنتھکم ہائٹس میں مکمل کیا جائے گا اور اس کی تکمیل کی ڈیڈ لائن 31 مارچ 2036 مقرر کی گئی ہے۔
اس معاہدے میں پاکستان کے علاوہ بحرین، بیلجیئم، چلی، ڈنمارک، مصر، یونان، انڈونیشیا، عراق، اسرائیل، اردن، کوریا، مراکش، نیدرلینڈز، ناروے، عمان، پولینڈ، پرتگال، رومانیہ، تھائی لینڈ اور ترکیہ شامل ہیں۔ معاہدے کو حتمی شکل دینے کا اختیار یوٹاہ میں واقع ہل ایئر فورس بیس پر موجود ایئر فورس لائف سائیکل مینجمنٹ سینٹر کے پاس ہے اور اس کا اجرا 27 اپریل 2026 کو کیا گیا۔
یہ پیش رفت دسمبر 2025 میں امریکہ کی جانب سے پاکستان کے ایف سولہ طیاروں کے بیڑے کے لیے 686 ملین ڈالر کی جدید ٹیکنالوجی اور معاونت کی منظوری کے چند ماہ بعد سامنے آئی ہے۔ ڈیفنس سیکیورٹی کوآپریشن ایجنسی کی جانب سے آٹھ دسمبر کو کانگریس کو بھیجے گئے نوٹیفکیشن کے مطابق اس پیکیج میں لنک سولہ ڈیٹا لنک سسٹمز، محفوظ مواصلاتی آلات، ایویونکس اپ گریڈ، تربیت اور وسیع تر لاجسٹک سپورٹ شامل ہے۔
ایجنسی کا کہنا ہے کہ یہ فیصلہ واشنگٹن کے وسیع تر تزویراتی اہداف سے ہم آہنگ ہے اور اس سے امریکی خارجہ پالیسی اور قومی سلامتی کے مقاصد کو تقویت ملے گی۔ حکام کے مطابق یہ اپ گریڈز پاکستان کے بلاک 52 اور مڈ لائف اپ گریڈ طیاروں کو جدید بنانے اور ان کی آپریشنل صلاحیتوں کو برقرار رکھنے کے لیے ضروری ہیں۔ اس اقدام سے پاکستان کو انسداد دہشت گردی کی جاری کوششوں اور مستقبل کے ممکنہ آپریشنز کے لیے امریکی اور اتحادی افواج کے ساتھ ہم آہنگی برقرار رکھنے میں مدد ملے گی۔
