امریکی وزیر خارجہ مارکو روبیو رواں ہفتے ویٹیکن سٹی اور اٹلی کا دورہ کریں گے جس کا مقصد دو طرفہ تعلقات میں پائی جانے والی کشیدگی کو کم کرنا ہے۔ اطالوی اخبارات لا ریپبلیکا اور کوریری ڈیلا سیرا کی رپورٹس کے مطابق اس دورے کا فیصلہ صدر ڈونلڈ ٹرمپ کی جانب سے پوپ لیو پر سوشل میڈیا پر تنقید کے بعد سامنے آیا ہے جس پر مسیحی برادری میں شدید تحفظات پائے جاتے ہیں۔
رپورٹس کے مطابق کیتھولک عقیدے سے تعلق رکھنے والے مارکو روبیو کی ویٹیکن کے اعلیٰ ترین سفارتی عہدیدار کارڈینل پیٹرو پارولن سے ملاقات متوقع ہے۔ تاہم یہ واضح نہیں ہے کہ آیا وزیر خارجہ کی پوپ لیو سے ذاتی ملاقات ہوگی یا نہیں۔ مارکو روبیو اس سے قبل مئی 2025 میں نائب صدر جے ڈی وینس کے ہمراہ پوپ سے ملاقات کر چکے ہیں۔
پوپ لیو نے حالیہ ہفتوں کے دوران ایران کے خلاف جاری جنگ اور ٹرمپ انتظامیہ کی سخت گیر تارکین وطن پالیسیوں پر کھل کر تنقید کی ہے۔ اپریل میں صدر ٹرمپ نے سوشل میڈیا پر پوپ کو کئی بار تنقید کا نشانہ بنایا اور ایک موقع پر انہیں خوفناک قرار دیا تھا۔ امریکی محکمہ خارجہ، ویٹیکن پریس آفس اور اطالوی حکومت نے فی الحال ان رپورٹس پر کوئی تبصرہ نہیں کیا ہے۔
مارکو روبیو اپنے دورے کے دوران اطالوی وزرائے خارجہ اور دفاع سے بھی ملاقاتیں کریں گے۔ یہ دورہ ایسے وقت میں ہو رہا ہے جب گزشتہ ماہ صدر ٹرمپ کی جانب سے اپنی قریبی اتحادی اطالوی وزیراعظم جارجیا میلونی کے خلاف سخت بیانات کے بعد دونوں ممالک کے تعلقات میں تناؤ پیدا ہوا تھا۔ اخبارات کے مطابق وزیراعظم میلونی سے ملاقات کا امکان رد نہیں کیا جا سکتا۔
یہ سفارتی پیش رفت پینٹاگون کی جانب سے جرمنی سے 5 ہزار امریکی فوجیوں کے انخلا کے اعلان کے چند روز بعد سامنے آئی ہے۔ ایران جنگ اور تجارتی محصولات پر اختلافات کے باعث امریکہ اور یورپ کے تعلقات پہلے ہی دباؤ کا شکار ہیں۔ اٹلی ان یورپی ممالک میں شامل ہے جہاں امریکی فوجیوں کی بڑی تعداد موجود ہے اور 2025 کے اختتام تک وہاں چھ اڈوں پر تقریباً 13 ہزار امریکی فوجی تعینات تھے۔
