امریکی فوج نے تصدیق کی ہے کہ مراکش میں سالانہ تربیتی مشقوں کے دوران لاپتہ ہونے والے امریکی فوجی کی لاش برآمد کر لی گئی ہے۔ ستائیس سالہ فرسٹ لیفٹیننٹ لامونٹ کی جونیئر ان دو امریکی اہلکاروں میں شامل تھے جو ایک ہفتہ قبل مراکش کے جنوبی ساحل کے قریب کیپ درعا ٹریننگ ایریا کے نزدیک لاپتہ ہو گئے تھے۔
امریکی فوج کے مطابق لاش ہفتے کی صبح مقامی وقت کے مطابق آٹھ بج کر پچپن منٹ پر مراکشی ملٹری سرچ ٹیم نے ساحل سے ملی، جو اس مقام سے تقریباً ایک میل دور تھا جہاں یہ حادثہ پیش آیا تھا۔ دوسرے لاپتہ فوجی کی شناخت تاحال ظاہر نہیں کی گئی ہے اور حکام کا کہنا ہے کہ ان کی تلاش کا عمل جاری ہے۔
ابتدائی رپورٹ کے مطابق یہ فوجی افریقن لائن نامی سالانہ مشقوں کا حصہ تھے تاہم دفاعی حکام کا کہنا ہے کہ یہ واقعہ مشقوں سے متعلق نہیں تھا۔ فوجی اہلکاروں کا ایک گروپ غروب آفتاب دیکھنے کے لیے ہائیکنگ پر گیا تھا جہاں ایک ناتجربہ کار تیراک پانی میں گر گیا، جس کو بچانے کے لیے دوسرے فوجی نے چھلانگ لگائی لیکن لہروں کی زد میں آ کر دونوں لاپتہ ہو گئے۔ ساتھیوں کی جانب سے بچاؤ کی کوششیں بار آور ثابت نہ ہو سکیں۔
ورجینیا کے رہائشی فرسٹ لیفٹیننٹ لامونٹ کی جونیئر ٹینتھ آرمی ایئر اینڈ میزائل ڈیفنس کمانڈ میں ایئر ڈیفنس آرٹلری آفیسر کے طور پر تعینات تھے۔ کمانڈنگ جنرل بریگیڈیئر جنرل کرٹس کنگ نے اپنے بیان میں کہا کہ فوج ان کی موت پر سوگوار ہے اور ان کے خاندان اور ساتھیوں کے ساتھ کھڑی ہے۔ انہوں نے مزید کہا کہ ہم ان کی خدمات کو خراج تحسین پیش کرتے ہیں اور اس مشکل وقت میں ان کے لواحقین کی ہر ممکن معاونت کی جائے گی۔
