وزیر برائے پارلیمانی امور طارق فضل چوہدری نے کہا ہے کہ پاکستان کے خلاف سازشیں کرنے والے عناصر اپنے مذموم مقاصد میں کبھی کامیاب نہیں ہوں گے۔
ایوان بالا میں اپوزیشن ارکان کے ایک نکتے کا جواب دیتے ہوئے وفاقی وزیر نے کہا کہ پوری قوم دہشت گردی کے عفریت کے خلاف سیسہ پلائی دیوار بنی ہوئی ہے۔ انہوں نے واضح کیا کہ مسلح افواج اور دیگر قانون نافذ کرنے والے ادارے ملک بھر سے دہشت گردوں کے خاتمے کے لیے انٹیلی جنس بیسڈ آپریشنز جاری رکھے ہوئے ہیں۔
طارق فضل چوہدری نے بتایا کہ پاک افغان سرحد پر دہشت گردوں کے ٹھکانوں پر کارروائیوں کے بعد دہشت گردی کے واقعات میں نمایاں کمی آئی ہے۔ تاہم انہوں نے افسوس کا اظہار کیا کہ اب دہشت گرد عناصر پولیس اہلکاروں اور عام شہریوں سمیت نرم اہداف کو نشانہ بنا رہے ہیں۔
انہوں نے کہا کہ مسلح افواج، قانون نافذ کرنے والے ادارے اور پولیس بزدل دشمن کا بہادری سے مقابلہ کر رہے ہیں۔ وفاقی وزیر کے مطابق دہشت گردی صرف خیبر پختونخوا اور بلوچستان تک محدود نہیں ہے بلکہ اس طرح کے افسوسناک واقعات اسلام آباد سمیت ملک کے دیگر حصوں میں بھی پیش آئے ہیں۔
اس موقع پر انہوں نے ترلائی اسلام آباد میں امام بارگاہ پر ہونے والے خودکش حملے کا حوالہ دیتے ہوئے کہا کہ اس سانحے میں چالیس سے زائد بے گناہ افراد اپنی جانوں سے ہاتھ دھو بیٹھے تھے۔
