برطانیہ کی شہزادی کیتھرین نے کینسر کے علاج کے بعد اپنے پہلے غیر ملکی دورے کا آغاز کر دیا۔ شہزادی ویلز بدھ کے روز اٹلی کے شہر ریجیو ایمیلیا پہنچیں جہاں شہریوں کی بڑی تعداد نے ان کا استقبال کیا۔ یہ کئی برسوں کے وقفے کے بعد شہزادی کا پہلا بین الاقوامی دورہ ہے۔
شہزادی کیتھرین نے مارچ 2024 میں کینسر میں مبتلا ہونے کا اعلان کر کے دنیا بھر کو حیران کر دیا تھا۔ بعد ازاں انہوں نے بتایا کہ وہ چھ ماہ تک کیمو تھراپی کے عمل سے گزری ہیں۔ بیماری کے بعد سے وہ انتہائی محتاط انداز میں عوامی زندگی میں دوبارہ متحرک ہو رہی ہیں۔
شمالی اٹلی کا یہ دو روزہ دورہ بچوں کی ابتدائی نشوونما کے حوالے سے منعقد کیا گیا ہے جو شہزادی کے دل کے بہت قریب ہے۔ اس دورے کا مقصد رائل فاؤنڈیشن سینٹر فار ارلی چائلڈ ہڈ کی بین الاقوامی سطح پر توسیع کے تناظر میں تخلیقی صلاحیتوں اور سماجی روابط کے فروغ کے طریقوں کا جائزہ لینا ہے۔
اس دورے کی اہمیت اس لیے بھی بڑھ گئی ہے کیونکہ لندن میں ان کے سسر بادشاہ چارلس سوئم بھی کینسر کا علاج کروا رہے ہیں، جنہوں نے بدھ کے روز برطانوی پارلیمنٹ کے نئے اجلاس کے افتتاحی موقع پر اہم خطاب کیا۔
شہزادی کیتھرین نے انسٹاگرام پر اپنے اس دو روزہ دورے کو خصوصی قرار دیا ہے۔ انہوں نے مقامی رہنماؤں کے تعلیمی طریقوں کی تعریف کرتے ہوئے کہا کہ وہ بچوں میں باہمی روابط کو فروغ دے رہے ہیں اور یہ تسلیم کرتے ہیں کہ ابتدائی بچپن میں سرمایہ کاری انتہائی اہم ہے۔
اپنے دورے کے دوران شہزادی مقامی خاندانوں، ماہرین تعلیم اور کمیونٹی لیڈرز سے ملاقاتیں کریں گی۔ واضح رہے کہ شہزادی کیتھرین کا آخری باضابطہ غیر ملکی دورہ 2022 میں بوسٹن کا تھا جہاں وہ شہزادہ ولیم کے ارتھ شاٹ پرائز کی تقریب میں شریک ہوئی تھیں۔
