روسی صدر ولادیمیر پیوٹن کی ملک بھر کے مسلمانوں کو عیدالفطر کی مبارکباد

ماسکو (شاہد گھمن) روسی صدر ولادیمیر پیوٹن نے عید الفطر کے پرمسرت موقع پر ملک بھر کے مسلمانوں کو دلی مبارکباد پیش کی ہے۔ اپنے پیغام میں انہوں نے عید کے تہوار کے حوالے سے نیک خواہشات کا اظہار کرتے ہوئے کہا کہ یہ دن رمضان المبارک کے مقدس مہینے کے اختتام پر منایا جاتا ہے جو صدیوں سے مسلمانوں کے لیے اخلاقی اقدار، ہمدردی اور انسانیت کا درس لے کر آتا ہے۔

صدر پیوٹن نے اس بات پر زور دیا کہ روس میں آباد مسلمان اپنے آباؤ اجداد کی تاریخی اور روحانی روایات کو انتہائی عقیدت کے ساتھ برقرار رکھے ہوئے ہیں اور اس خوشی کے موقع کو اپنے اہل خانہ اور برادری کے ساتھ مل کر پروقار انداز میں مناتے ہیں۔ انہوں نے کہا کہ ماہ رمضان کے دوران فلاحی، تعلیمی اور بچوں کی فلاح و بہبود کے لیے کی جانے والی سرگرمیاں اس مہینے کی روح کی عکاس ہیں۔

روسی صدر نے مسلم تنظیموں کے کردار کو سراہتے ہوئے کہا کہ یہ ادارے خاندانی نظام کو مستحکم کرنے، نئی نسل کی تربیت اور معاشرتی ہم آہنگی کے فروغ میں اہم کردار ادا کر رہے ہیں۔ انہوں نے مشاہدہ کیا کہ یہ تنظیمیں حکومتی اور سماجی اداروں کے ساتھ مل کر تعمیری مکالمے میں مصروف ہیں اور حب الوطنی، تعلیم اور انسانی ہمدردی کے اقدامات میں بڑھ چڑھ کر حصہ لیتی ہیں۔

ولادیمیر پیوٹن نے ان مسلمانوں کو خصوصی خراج تحسین پیش کیا جو روس کی آزادی اور خودمختاری کے دفاع میں اپنے ساتھیوں کے شانہ بشانہ خدمات انجام دے رہے ہیں، نیز ان افراد کی بھی تعریف کی جو ان اہلکاروں کے خاندانوں کی معاونت کر رہے ہیں۔ پیغام کے آخر میں روسی صدر نے مسلم کمیونٹی کی صحت، کامیابی اور خوشحالی کے لیے دعا کی اور اس عزم کا اظہار کیا کہ روس اپنے متنوع ثقافتی اور مذہبی ورثے کا احترام کرتا ہے۔