قطر: تکنیکی خرابی کے باعث فوجی ہیلی کاپٹر سمندر میں گر کر تباہ

قطر کا ایک فوجی ہیلی کاپٹر تکنیکی خرابی کے باعث سمندر میں گر کر تباہ ہو گیا ہے جس کے بعد حکام کی جانب سے عملے اور مسافروں کی تلاش کا عمل شروع کر دیا گیا ہے۔

قطری وزارت دفاع کی جانب سے سماجی رابطے کی ویب سائٹ ایکس پر جاری کردہ بیان میں کہا گیا ہے کہ ہیلی کاپٹر معمول کی پرواز پر تھا کہ اچانک تکنیکی خرابی پیش آئی جس کے نتیجے میں وہ ریاست کی علاقائی حدود میں سمندر میں جا گرا۔

وزارت داخلہ کے مطابق حادثے کے مقام پر امدادی کارروائیوں کے لیے متعدد خصوصی ٹیمیں روانہ کر دی گئی ہیں جو لاپتہ افراد کی تلاش میں مصروف ہیں۔

قطری حکام نے تاحال ہیلی کاپٹر کے روٹ یا اس میں سوار افراد کی درست تعداد کے بارے میں کوئی تفصیلات فراہم نہیں کی ہیں۔

مشرق وسطیٰ میں جاری کشیدگی کے باوجود حکام نے اس واقعے کا تعلق خطے میں جاری تنازعات یا کسی بیرونی حملے سے نہیں جوڑا ہے۔