کریمیہ میں روسی فوجی طیارہ گر کر تباہ، 29 افراد ہلاک

روس کے زیر قبضہ کریمیا میں ایک فوجی طیارہ گر کر تباہ ہو گیا جس کے نتیجے میں عملے کے چھ ارکان اور تئیس مسافر ہلاک ہو گئے۔ روسی وزارت دفاع کے مطابق حادثے کا شکار ہونے والا طیارہ اے این چھبیس تھا جو معمول کی پرواز پر تھا۔

روسی خبر رساں اداروں کے مطابق طیارے کا رابطہ منگل کی شام چھ بجے کے قریب منقطع ہوا تھا۔ ابتدائی اطلاعات کے مطابق سوویت دور کا یہ ٹربوپروپ طیارہ ایک پہاڑی چٹان سے ٹکرا کر تباہ ہوا۔

روس کی تحقیقاتی کمیٹی نے تصدیق کی ہے کہ طیارے پر عملے کے سات ارکان اور تئیس مسافر سوار تھے۔ حکام کی جانب سے فوری طور پر یہ واضح نہیں کیا گیا کہ عملے کا کوئی رکن زندہ بچ سکا ہے یا نہیں۔

تحقیقاتی کمیٹی نے پرواز کے ضوابط کی خلاف ورزی کے شبہے میں مجرمانہ تحقیقات کا آغاز کر دیا ہے۔ جائے حادثہ باخچی سرائے کے پہاڑی اور جنگلات والے علاقے میں واقع ہے جہاں تلاش کا عمل جاری ہے۔

وزارت دفاع نے انٹرفیکس نیوز ایجنسی کو بتایا کہ حادثے کی وجہ ممکنہ طور پر فنی خرابی ہو سکتی ہے اور طیارے پر کسی بیرونی حملے کے شواہد نہیں ملے۔

کریملن کی جانب سے دو ہزار بائیس میں یوکرین میں فوج بھیجنے کے بعد سے روسی فوجی طیاروں کے حادثات میں اضافہ ہوا ہے۔ اس سے قبل دسمبر میں ایوانوو ریجن میں اے این بائیس طیارہ گرنے سے عملے کے سات افراد ہلاک ہوئے تھے۔ اسی طرح اکتوبر میں لیپٹسک میں مگ اکتیس جبکہ اپریل دو ہزار پچیس میں ارکتسک میں ٹی یو بائیس ایم تھری بمبار طیارہ بھی حادثات کا شکار ہو چکے ہیں۔

اس سے قبل مارچ دو ہزار چبیس میں مغربی روس کے ایئر بیس سے اڑان بھرنے والا فوجی طیارہ پندرہ افراد سمیت تباہ ہوا تھا جبکہ جنوری دو ہزار چبیس میں یوکرین کی سرحد کے قریب آئی ایل چھہتر طیارہ گرنے کا واقعہ پیش آیا تھا۔ اکتوبر دو ہزار بائیس میں یسک شہر کے رہائشی علاقے میں ایس یو چونتیس بمبار طیارہ گرنے سے پندرہ افراد کی جانیں گئی تھیں۔