تمیم اقبال بنگلہ دیش کرکٹ بورڈ کے کم عمر ترین سربراہ مقرر

بنگلہ دیش کرکٹ بورڈ کی انتظامیہ میں بڑی تبدیلی سامنے آئی ہے جہاں سابق کپتان تمیم اقبال کو بورڈ کا نیا سربراہ مقرر کر دیا گیا ہے۔ نیشنل اسپورٹس کونسل نے اکتوبر میں ہونے والے انتخابات میں بے قاعدگیوں کی تحقیقات کے بعد موجودہ بورڈ آف ڈائریکٹرز کو تحلیل کر دیا ہے۔

نیشنل اسپورٹس کونسل کے اسپورٹس ڈائریکٹر محمد امین الاسلام احسن نے ڈھاکا میں میڈیا کو بتایا کہ تحقیقاتی کمیٹی نے انتخابی عمل میں سنگین بے قاعدگیاں پائی ہیں۔ انہوں نے مزید کہا کہ ہم نے انٹرنیشنل کرکٹ کونسل کو آگاہ کر دیا ہے کہ سابقہ بورڈ درست طریقے سے تشکیل نہیں پایا تھا اور وہ اپنے فرائض کی ادائیگی میں ناکام رہا ہے۔ ہمیں یقین ہے کہ آئی سی سی اس فیصلے کی تائید کرے گی۔

سینتیس سالہ تمیم اقبال بنگلہ دیش کرکٹ بورڈ کے سب سے کم عمر صدر بن گئے ہیں۔ وہ گیارہ رکنی عبوری کمیٹی کی قیادت کریں گے جس میں سابق کپتان منہاج العابدین اور معروف کرکٹر و کمنٹیٹر اطہر علی خان بھی شامل ہیں۔ کمیٹی کے دیگر ارکان میں رعنا امام، مرزا یاسر عباس، سید ابراہیم احمد، اسرافیل خسرو، تنزیل چوہدری، سلمان اصفہانی، رفیق الاسلام اور فہیم سنہا شامل ہیں۔

سابقہ بورڈ کی سربراہی امین الاسلام کر رہے تھے جن کے دور میں بنگلہ دیش نے سیکیورٹی خدشات کا جواز بنا کر رواں برس بھارت میں شیڈول ٹی ٹوئنٹی ورلڈ کپ میں شرکت سے انکار کر دیا تھا، جس کے بعد اسکاٹ لینڈ کو ٹورنامنٹ میں شامل کیا گیا تھا۔

نئی انتظامیہ کے قیام کے بعد بنگلہ دیش کرکٹ ٹیم اب نیوزی لینڈ کے خلاف ہوم سیریز کی تیاریوں میں مصروف ہے۔ اس سیریز کا آغاز سترہ اپریل سے ہوگا جس میں تین ایک روزہ، تین ٹی ٹوئنٹی اور دو ٹیسٹ میچز کھیلے جائیں گے۔