برطانیہ میں داخلے پر پابندی کے بعد کانی ویسٹ کے اٹلی میں کنسرٹ پر تنازع کھڑا ہو گیا

امریکی ریپر کانی ویسٹ، جو اب ‘یے’ کے نام سے جانے جاتے ہیں، کی برطانیہ میں داخلے پر پابندی کے بعد اٹلی میں ان کی متوقع پرفارمنس پر سوالات اٹھ کھڑے ہوئے ہیں۔ برطانوی حکومت کی جانب سے اجازت نامہ منسوخ کیے جانے کے بعد لندن میں منعقد ہونے والا وائرلیس فیسٹیول منسوخ کر دیا گیا ہے۔

برطانوی وزیراعظم کیئر سٹارمر نے سماجی رابطے کی ویب سائٹ پر اپنے بیان میں کہا کہ کانی ویسٹ کو وائرلیس فیسٹیول میں بطور ہیڈلائنر مدعو ہی نہیں کیا جانا چاہیے تھا۔ یہ فیصلہ ریپر کی جانب سے گزشتہ برس جاری کیے گئے گانے اور متنازع علامات کے استعمال پر ہونے والی شدید تنقید کے تناظر میں کیا گیا۔ یے نے جنوری میں وال سٹریٹ جرنل میں معافی مانگتے ہوئے اسے ذہنی بیماری کا نتیجہ قرار دیا تھا۔

اب کانی ویسٹ کی 18 جولائی کو شمالی اٹلی کے علاقے ایمیلیا روماگنا میں ہیلوواٹ فیسٹیول میں شرکت متوقع ہے، جس پر مقامی سطح پر تحفظات کا اظہار کیا جا رہا ہے۔ اطالوی کنفیڈریشن آف ورکرز یونین کی نمائندہ روزاماریہ پاپالیو نے کہا کہ ریجیو ایمیلیا شہر کی مضبوط اینٹی فاشسٹ شناخت کے پیش نظر ایسے فنکار کو خوش آمدید کہنا تضاد لگتا ہے جس پر یہود مخالف بیانات کے الزامات ہوں۔

یونین نے شہر کے میئر مارکو ماساری سے مطالبہ کیا ہے کہ وہ کانی ویسٹ کے لیے مقامی یہودی برادری سے ملاقات کو لازمی قرار دیں تاکہ ماضی کے تلخ بیانات پر مفاہمت کا پیغام جا سکے۔ میئر مارکو ماساری نے اپنے بیان میں کانی ویسٹ کے رویے سے لاتعلقی کا اظہار کرتے ہوئے کہا کہ حتمی فیصلہ وفاقی حکومت کے اختیار میں ہے۔

دوسری جانب ہیلوواٹ فیسٹیول کے ڈائریکٹر وکٹر یاری میلانی نے اعتراف کیا کہ کانی ویسٹ کے ماضی کے اقدامات پر شدید ردعمل سامنے آیا ہے۔ انہوں نے کہا کہ انتظامیہ نے ریپر سے اٹلی کے عوام سے بھی باضابطہ معافی مانگنے کا مطالبہ کیا ہے۔ فیسٹیول میں ٹریوس سکاٹ، ریٹا اورا اور مارٹن گیرکس جیسے دیگر فنکار بھی شرکت کریں گے۔ فی الحال فیسٹیول کے خلاف کسی باقاعدہ احتجاج کا اعلان نہیں کیا گیا، تاہم یونین حکام نے عوامی ردعمل کے امکان کو مسترد نہیں کیا ہے۔