امریکہ ایران جنگ بندی: پاکستانی سفیر کی سفارتی کوششوں کی کامیابی کا اعتراف

امریکہ میں تعینات پاکستانی سفیر رضوان سعید شیخ کا کہنا ہے کہ امریکہ اور ایران کے مابین جنگ بندی اور مذاکرات کا آغاز پاکستان کی گزشتہ کئی ہفتوں پر محیط سفارتی کوششوں کا نتیجہ ہے۔ سی این این کو دیے گئے ایک خصوصی انٹرویو میں انہوں نے اس پیش رفت کو سفارت کاری اور بات چیت کی کامیابی قرار دیا۔

سفیر پاکستان نے اس عمل میں شامل تمام فریقین کی جانب سے پاکستان پر اعتماد کرنے پر ان کا شکریہ ادا کیا۔ انہوں نے واضح کیا کہ پاکستان اپنی تاریخ میں ہمیشہ مثبت سفارت کاری کو ترجیح دیتا رہا ہے۔

رضوان سعید شیخ نے جنگ بندی کی راہ ہموار کرنے میں سعودی عرب، ترکیہ، مصر، قطر اور چین سمیت دیگر ممالک کے کردار کو سراہا۔ انہوں نے خاص طور پر چین کی جانب سے پہلے دن سے ہی تحمل اور سفارت کاری پر زور دینے کی پالیسی کو انتہائی اہم قرار دیا۔

پاکستانی سفیر نے بتایا کہ ملکی قیادت براہ راست ان مذاکرات میں شامل رہی جس سے اس سفارتی مشن کی کامیابی میں مدد ملی۔ انہوں نے اس بات پر زور دیا کہ مذاکرات کو حتمی نتیجے تک پہنچانے کے لیے بیرونی دباؤ سے پاک ہونا ضروری ہے اور فیصلے کا اختیار متعلقہ فریقین کے پاس ہی ہونا چاہیے۔ پاکستان کا کردار محض ایک سہولت کار کا رہا ہے۔

خلیجی ممالک کے ساتھ پاکستان کے دیرینہ تعلقات کا ذکر کرتے ہوئے انہوں نے کہا کہ ان ممالک میں تقریباً 55 لاکھ پاکستانی مقیم ہیں۔ سفارتی کوششوں اور جنگ بندی کے دوران خلیجی ممالک کی قیادت کے ساتھ مسلسل مشاورت جاری رکھی گئی۔

اپنے بیان کے اختتام پر رضوان سعید شیخ نے امید ظاہر کی کہ پاکستان کی مخلصانہ کوششیں خطے میں پائیدار امن لائیں گی۔ انہوں نے کہا کہ خطے کا امن و استحکام نہ صرف خلیجی خطے بلکہ عالمی سیاست اور معیشت پر بھی مثبت اثرات مرتب کرے گا۔