پاکستان نے ایک مخلص اور قریبی ہمسائے کے طور پر ذمہ دارانہ ثالثی کا کردار ادا کیا: علامہ نقوی

جعفریہ الائنس پاکستان کے صدر علامہ شہنشاہ حسین نقوی نے مطالبہ کیا ہے کہ پاکستان ایران اور امریکہ کے درمیان مذاکرات کی راہ ہموار کرنے کے لیے فعال کردار ادا کرے۔

جمعرات کو اپنے ایک بیان میں علامہ شہنشاہ حسین نقوی نے کہا کہ حالیہ جنگ بندی دراصل ایران کی کامیابی ہے جو دنیا بھر کے مظلومین اور امت مسلمہ کی فتح ہے۔

انہوں نے کہا کہ پاکستان نے ثالثی کا کردار ادا کر کے ایک مخلص اور قریبی ہمسایہ ملک ہونے کی ذمہ داری کا ثبوت دیا ہے۔ ان کا کہنا تھا کہ اس تنازع کے دوران امریکہ اور اسرائیل اپنے تزویراتی مقاصد حاصل کرنے میں مکمل طور پر ناکام رہے ہیں۔

علامہ شہنشاہ حسین نقوی نے زور دیا کہ پاکستان کو چاہیے کہ وہ روس اور چین کے ساتھ مل کر کام کرے تاکہ عارضی جنگ بندی کو دیرپا اور پائیدار امن میں تبدیل کیا جا سکے۔

انہوں نے مزید کہا کہ ایران کی شرائط پر ہونے والی جنگ بندی نے امریکہ کی عالمی سپر پاور کی حیثیت کو بری طرح متاثر کیا ہے۔ انہوں نے اس صورتحال کو شہید رہنماء آیت اللہ علی خامنہ ای کی قربانیوں کا ثمر قرار دیا۔

اپنے بیان کے اختتام پر انہوں نے شہید رہنماء اور غزہ، لبنان اور یمن کے مظلوم عوام کو زبردست خراج تحسین پیش کیا۔