میچ کے دوران میدان چھوڑنے پر لائنز نے بیئرز سوانپول کو ٹیم سے فارغ کر دیا

جنوبی افریقہ کی کرکٹ ٹیم لائنز نے آل راؤنڈر بیئرز سوانپول کا معاہدہ ختم کر دیا ہے۔ یہ فیصلہ سوانپول کی جانب سے ڈومیسٹک 50 اوورز کے فائنل میچ کے دوران ٹیم کو ادھورا چھوڑ کر جانے کے بعد کیا گیا ہے۔

واقعہ اس وقت پیش آیا جب سوانپول نے ٹائٹنز کے خلاف اہم فائنل میچ کے 43 ویں اوور کے دوران میدان چھوڑ دیا تاکہ وہ انگلینڈ جانے والی اپنی پرواز پکڑ سکیں۔ ان کی غیر موجودگی کے باعث ٹیم کو میچ کے آخری لمحات میں صرف 10 کھلاڑیوں کے ساتھ میدان میں اترنا پڑا اور ٹیم کو شکست کا سامنا کرنا پڑا۔

چونکہ یہ اقدام کسی انجری کی وجہ سے نہیں تھا، اس لیے ٹیم انتظامیہ ان کی جگہ کسی اور کھلاڑی کو میدان میں نہیں اتار سکی۔ اس غیر ذمہ دارانہ رویے کے بعد کرکٹ ساؤتھ افریقہ نے ان کا نو آبجیکشن سرٹیفکیٹ روک لیا ہے، جس کی وجہ سے وہ فی الحال انگلش کاؤنٹی ٹیم وورسٹر شائر کے لیے کھیلنے سے قاصر ہیں۔

وورسٹر شائر نے جمعہ کو مڈل سیکس کے خلاف میچ کے لیے اعلان کردہ 13 رکنی اسکواڈ میں سوانپول کو شامل نہیں کیا اور ان کی جگہ اولیور ہینن ڈالبے کو عارضی طور پر ٹیم کا حصہ بنایا ہے۔

لائنز کرکٹ کے سی ای او جونو لیف رائٹ نے اپنے بیان میں کہا ہے کہ یہ تمام متعلقہ فریقین کے لیے ایک افسوسناک صورتحال تھی تاہم اب اس معاملے کو ختم کر دیا گیا ہے۔ انہوں نے مزید کہا کہ لائنز کرکٹ اپنے پیشہ ورانہ معیارات پر کوئی سمجھوتہ نہیں کرتی اور اس طرح کے معاملات کو انتہائی سنجیدگی سے لیا جاتا ہے۔

دوسری جانب بیئرز سوانپول نے اپنی ٹیم سے معافی مانگ لی ہے۔ انہوں نے اپنے بیان میں کہا کہ وہ لائنز کرکٹ کے شکر گزار ہیں اور فائنل میں پیش آنے والے واقعے پر پوری لائنز فیملی سے معذرت خواہ ہیں۔ انہوں نے یقین دلایا کہ انہوں نے اس واقعے سے بہت کچھ سیکھا ہے۔