اوپن اے آئی کے سی ای او سیم آلٹمین کی رہائش گاہ پر پٹرول بم سے حملہ، ملزم گرفتار

سان فرانسسکو پولیس نے اوپن اے آئی کے چیف ایگزیکٹو آفیسر سیم آلٹمین کی رہائش گاہ پر آتش گیر مواد پھینکنے اور کمپنی کے ہیڈ کوارٹر کے باہر دھمکیاں دینے کے الزام میں ایک شخص کو گرفتار کر لیا ہے۔

سان فرانسسکو پولیس ڈیپارٹمنٹ کی جانب سے جاری کردہ بیان کے مطابق بیس سالہ مشتبہ نوجوان نے صبح چار بج کر بارہ منٹ پر نارتھ بیچ میں واقع ایک گھر پر مولوٹوف کاک ٹیل پھینکا اور فرار ہو گیا۔ پولیس نے واقعے کے تقریباً ایک گھنٹے بعد ملزم کو اس وقت حراست میں لیا جب انہیں ایک اور عمارت کو نذر آتش کرنے کی دھمکی ملنے کی کال موصول ہوئی۔

اوپن اے آئی کے ترجمان نے واقعے کی تصدیق کرتے ہوئے بتایا کہ خوش قسمتی سے اس حملے میں کوئی جانی نقصان نہیں ہوا۔ ترجمان نے سان فرانسسکو پولیس کے فوری ردعمل اور ملازمین کی سیکیورٹی کو یقینی بنانے پر مقامی انتظامیہ کا شکریہ ادا کیا۔ کمپنی کی جانب سے تفتیشی اداروں کے ساتھ مکمل تعاون کیا جا رہا ہے۔

یہ واقعہ ایک ایسے وقت میں پیش آیا ہے جب اوپن اے آئی کو شدید دباؤ کا سامنا ہے۔ کمپنی کو حال ہی میں امریکی حکومت کے ساتھ ملٹری آپریشنز میں ٹیکنالوجی کے استعمال کے معاہدے پر تنقید کا سامنا رہا ہے۔ ایک حالیہ سروے کے مطابق عوام میں مصنوعی ذہانت کی مقبولیت میں بھی کمی دیکھی گئی ہے۔

سیم آلٹمین نے جمعہ کی سہ پہر اپنے بلاگ پوسٹ میں واقعے پر ردعمل دیتے ہوئے کہا کہ انڈسٹری پر ہونے والی زیادہ تر تنقید اس ٹیکنالوجی کے ممکنہ اثرات پر مبنی مخلصانہ خدشات کا نتیجہ ہے۔ انہوں نے زور دیا کہ اس بحث کے دوران ہمیں بیانات اور ہتھکنڈوں میں کشیدگی کو کم کرنا چاہیے تاکہ حقیقی اور علامتی دونوں صورتوں میں پرتشدد واقعات سے بچا جا سکے۔

پولیس حکام کا کہنا ہے کہ ابتدائی تحقیقات اور شواہد کی روشنی میں بیس سالہ ملزم کا سیم آلٹمین کی رہائش گاہ پر حملے میں ملوث ہونا ثابت ہوا ہے۔ تاہم پولیس نے تاحال ملزم کے محرکات کے بارے میں کوئی حتمی بیان جاری نہیں کیا ہے۔