امریکی نائب صدر جے ڈی وینس کا وفد ایران سے مذاکرات کے لیے اسلام آباد پہنچ گیا

امریکی نائب صدر جے ڈی وینس کی قیادت میں ایک اعلیٰ سطحی وفد ایران کے ساتھ مذاکرات میں شرکت کے لیے ہفتے کے روز اسلام آباد پہنچ گیا۔

ذرائع کے مطابق امریکی وفد دو خصوصی طیاروں کے ذریعے ہفتے کی صبح پاکستان کے ایک فضائی اڈے پر اترا۔ وفد میں امریکی خصوصی ایلچی اسٹیو وٹکوف اور صدارتی مشیر جیرڈ کشنر بھی شامل ہیں۔

اسلام آباد پہنچنے پر وفاقی وزیر خارجہ اسحاق ڈار اور چیف آف آرمی اسٹاف فیلڈ مارشل عاصم منیر نے امریکی نائب صدر کا استقبال کیا۔

یہ دورہ پاکستان کی ثالثی میں ہونے والی دو ہفتے کی جنگ بندی کے بعد امریکہ اور ایران کے درمیان مذاکرات کی تیاریوں کے سلسلے میں ہو رہا ہے۔ ان مذاکرات کا مقصد علاقائی کشیدگی کو کم کرنا اور لبنان میں اسرائیلی حملوں کے باعث خطرے میں پڑنے والی جنگ بندی کو مستحکم بنانا ہے۔

روانگی سے قبل اپنے بیان میں جے ڈی وینس کا کہنا تھا کہ اگر تہران تعمیری انداز میں بات چیت کے لیے تیار ہو تو واشنگٹن مذاکرات کے لیے تیار ہے۔ انہوں نے مزید کہا کہ اگر ایرانی خلوص نیت سے بات چیت کرنا چاہتے ہیں تو ہم دوستی کا ہاتھ بڑھانے کے لیے تیار ہیں۔