ایک نشست میں معاہدہ ممکن نہیں، کئی نکات پر اتفاق ہو چکا ہے: ایران

اسلام آباد میں ہونے والے مذاکرات کے حوالے سے ایرانی وزارت خارجہ کے ترجمان اسماعیل بقائی نے کہا ہے کہ پیش رفت کا انحصار امریکہ کی جانب سے سنجیدگی اور نیک نیتی کے مظاہرے پر ہے۔ انہوں نے واضح کیا کہ کسی بھی معاہدے کی توقع ایک ہی نشست سے نہیں کی جانی چاہیے۔

سماجی رابطے کی ویب سائٹ ایکس پر اپنے پیغام میں ترجمان نے کہا کہ پیچیدہ مسائل اور حالات کے پیش نظر فوری معاہدے کی توقع کسی کو نہیں تھی۔ انہوں نے بتایا کہ مذاکرات کے دوران کچھ نئے موضوعات بھی زیر بحث آئے ہیں اور ایران اپنے حقوق اور مفادات کے تحفظ کے لیے سفارتی کوششیں جاری رکھے گا۔

اسماعیل بقائی نے بتایا کہ ایرانی وفد کے لیے اسلام آباد میں مصروف دن رہا۔ پاکستان کی ثالثی اور سنجیدہ کوششوں سے شروع ہونے والے مذاکرات بغیر کسی وقفے کے جاری رہے جس کے دوران فریقین کے مابین پیغامات اور مسودات کا تبادلہ ہوا۔

ترجمان کے مطابق مذاکرات میں آبنائے ہرمز، جوہری مسائل، جنگی نقصانات کے ازالے، پابندیوں کے خاتمے اور خطے میں جنگ کے مکمل خاتمے جیسے اہم امور پر تبادلہ خیال کیا گیا۔ کئی نکات پر اتفاق رائے ہوا تاہم دو سے تین معاملات پر اختلاف کے باعث حتمی معاہدہ نہ ہو سکا۔

انہوں نے کہا کہ ایران، پاکستان اور دیگر دوست ممالک کے مابین مشاورت کا عمل جاری رہے گا۔ ان کا کہنا تھا کہ سفارت کاری کبھی ختم نہیں ہوتی اور یہ قومی مفادات کے تحفظ کا ذریعہ ہے۔

اسماعیل بقائی نے مذاکرات کی میزبانی اور سفارتی عمل کو آگے بڑھانے کے لیے حکومت پاکستان اور یہاں کے عوام کی مخلصانہ کوششوں کا شکریہ ادا کیا۔ انہوں نے اعادہ کیا کہ سفارتی عمل کی کامیابی کا دارومدار فریق مخالف کی سنجیدگی اور ایران کے جائز حقوق کے اعتراف پر ہے۔