ہسپانوی وزیراعظم کا کثیر قطبی عالمی نظام میں چین کے کردار کو مزید بڑھانے پر زور

ہسپانوی وزیر اعظم پیڈرو سانچیز نے چین پر زور دیا ہے کہ وہ موسمیاتی تبدیلی، سلامتی، دفاع اور عدم مساوات کے خاتمے جیسے عالمی مسائل میں زیادہ فعال اور اہم کردار ادا کرے۔ بیجنگ کی سنگھوا یونیورسٹی میں خطاب کرتے ہوئے انہوں نے کہا کہ ایسے وقت میں جب امریکہ عالمی قیادت کے کردار سے دستبردار ہو رہا ہے، یورپ کو اپنی کوششیں دوگنا کرنا ہوں گی۔

سانچیز چار برسوں میں اپنے چوتھے دورہ چین کے دوران گفتگو کر رہے تھے۔ یہ دورہ ایک ایسے وقت میں ہو رہا ہے جب مغربی ممالک بیجنگ کے ساتھ تجارتی اور سیکیورٹی تناؤ کے باوجود روابط برقرار رکھنے کے خواہاں ہیں۔ اس سے قبل رواں برس برطانیہ، آئرلینڈ، کینیڈا اور فن لینڈ کے وزرائے اعظم بھی چین کا دورہ کر چکے ہیں۔

ہسپانوی وزیر اعظم کا کہنا تھا کہ چین عالمی صحت، مصنوعی ذہانت کے ذمہ دارانہ استعمال، جوہری ہتھیاروں کے پھیلاؤ کو روکنے اور موسمیاتی تبدیلیوں کے خلاف مزید اقدامات کر سکتا ہے۔ انہوں نے اس بات پر زور دیا کہ بین الاقوامی قوانین کا احترام کیا جانا چاہیے اور لبنان، ایران، غزہ، مغربی کنارے اور یوکرین میں جاری تنازعات کا خاتمہ ہونا چاہیے۔

منگل کو پیڈرو سانچیز کی چینی صدر شی جن پنگ سے ملاقات متوقع ہے جس میں جغرافیائی سیاست پر خصوصی توجہ مرکوز کی جائے گی۔ ہسپانوی وزیر اعظم نے نشاندہی کی کہ اسپین کے کل تجارتی خسارے کا 74 فیصد چین کے ساتھ ہے، اور ایک متوازن عالمی معیشت کی تشکیل کے لیے تعاون ناگزیر ہے۔

میڈرڈ کو امید ہے کہ اس دورے سے تجارتی خسارے کو کم کرنے میں مدد ملے گی، جو چار برسوں میں دوگنا ہو کر 2025 میں تقریباً 50 ارب ڈالر تک پہنچ چکا ہے۔ اسپین چین کو اپنی زرعی اور صنعتی برآمدات بڑھانے کا خواہشمند ہے۔

سرکاری چینی خبر رساں ادارے ژنہوا کے مطابق سانچیز کا دورہ دوطرفہ تعلقات کو مزید مستحکم کرے گا اور بڑھتی ہوئی عالمی غیر یقینی صورتحال کے دوران چین اور یورپ کے درمیان مسلسل رابطوں کی راہ ہموار کرے گا۔