اسلام آباد میں سفارتی سرگرمیاں ایک بار پھر عروج پر ہیں کیونکہ ایران کے وزیر خارجہ عباس عراقچی آج رات ایک مختصر وفد کے ہمراہ وفاقی دارالحکومت پہنچ رہے ہیں۔ یہ دورہ امریکہ اور ایران کے درمیان مذاکرات کے دوسرے دور کے امکانات اور خطے میں کشیدگی کم کرنے کی کوششوں کے تناظر میں انتہائی اہمیت کا حامل ہے۔
پاکستان طویل عرصے سے واشنگٹن اور تہران کے مابین رابطوں کو بحال رکھنے کے لیے سہولت کار کا کردار ادا کر رہا ہے۔ حکومتی ذرائع کے مطابق اسلام آباد ایک بار پھر ان اہم مذاکرات کی میزبانی کے لیے تیار دکھائی دیتا ہے۔ اس سلسلے میں ایک امریکی لاجسٹک اور سیکیورٹی ٹیم پہلے ہی اسلام آباد پہنچ چکی ہے جو ممکنہ مذاکرات کی تیاریوں کی عکاسی کرتی ہے۔
یہ پیشرفت نائب وزیراعظم اور وزیر خارجہ سینیٹر محمد اسحاق ڈار اور ایرانی وزیر خارجہ عباس عراقچی کے درمیان حالیہ ٹیلی فونک رابطے کے بعد سامنے آئی ہے۔ اس گفتگو میں علاقائی صورتحال، جنگ بندی کے امکانات اور امریکہ ایران کشیدگی کم کرنے کے لیے سفارتی کوششوں پر تبادلہ خیال کیا گیا تھا۔
وزیر خارجہ اسحاق ڈار نے اس بات پر زور دیا کہ خطے میں پائیدار امن اور استحکام کے لیے بامقصد بات چیت ناگزیر ہے۔ انہوں نے اعادہ کیا کہ پاکستان تمام متعلقہ فریقین کے ساتھ رابطے برقرار رکھنے اور سفارتی حل تلاش کرنے کے لیے پرعزم ہے۔ ایرانی وزیر خارجہ نے علاقائی استحکام کے لیے پاکستان کے تعمیری کردار اور سفارتکاری کے ذریعے کشیدگی کم کرنے کی کوششوں کو سراہا۔
وزیراعظم شہباز شریف کی قیادت میں پاکستان کی سول اور عسکری قیادت عالمی اسٹیک ہولڈرز کے ساتھ مسلسل رابطے میں ہے تاکہ خطے کو کسی بھی ممکنہ تصادم سے بچایا جا سکے۔ اس سفارتی حکمت عملی کا بنیادی مقصد امریکہ اور ایران کے درمیان ایک منظم مذاکراتی عمل کی راہ ہموار کرنا ہے۔
دوسری جانب ایرانی وزیر خارجہ عباس عراقچی نے واضح کیا ہے کہ علاقائی کشیدگی کے باوجود ایران کے ریاستی ادارے متحد ہیں اور ان کے سفارتی اور عسکری محاذوں کے درمیان مکمل ہم آہنگی پائی جاتی ہے۔ اسلام آباد کی جانب سے ثالثی کی یہ کوششیں ایسے وقت میں کی جا رہی ہیں جب عالمی برادری کی نظریں امریکہ اور ایران کے مابین بدلتی ہوئی صورتحال پر مرکوز ہیں۔
