افغان وزارت خارجہ نے قطر میں ویزوں کے منتظر اپنے شہریوں پر زور دیا ہے کہ وہ وطن واپس لوٹ آئیں۔ وزارت کے ترجمان عبدالقہار بلخی نے ایک بیان میں کہا ہے کہ افغانستان تمام افغانوں کا مشترکہ وطن ہے اور ملک میں حالات مکمل طور پر محفوظ ہیں۔
ترجمان کے مطابق قطر میں قیام پذیر ان افغان شہریوں کو، جو امریکہ منتقلی کے منتظر ہیں، یہ اختیار دیا گیا ہے کہ وہ یا تو افغانستان واپس آجائیں یا کسی تیسرے ملک میں آباد ہونے کی کوشش کریں۔ عبدالقہار بلخی نے یقین دہانی کرائی کہ کوئی بھی شہری سیکیورٹی خدشات کی بنا پر ملک چھوڑنے پر مجبور نہیں ہے اور وہ مکمل اعتماد اور اطمینان کے ساتھ واپس آ سکتے ہیں۔
بیان میں مزید کہا گیا ہے کہ جو افراد کسی اور ملک منتقل ہونا چاہتے ہیں، وہ مناسب وقت پر قانونی اور باوقار ذرائع استعمال کر سکتے ہیں۔ افغان وزارت خارجہ نے اس عزم کا اظہار کیا کہ وہ بیرون ملک مقیم اپنے شہریوں کے حقوق کے تحفظ کے لیے دیگر ممالک کے ساتھ دوطرفہ قونصلر انتظامات کے تحت کام کرنے کے لیے تیار ہے۔
سن دو ہزار اکیس میں طالبان کے اقتدار میں آنے کے بعد سے ہزاروں افغان شہری قطر اور پاکستان جیسے ممالک میں مقیم ہیں تاکہ وہ امریکہ سمیت دیگر ممالک کے لیے ویزا حاصل کر سکیں۔
ایک وکالت گروپ کے مطابق بائیس اپریل کو ڈیموکریٹک ریپبلک آف کانگو کے ساتھ گیارہ سو ایسے افغان شہریوں کو دوبارہ آباد کرنے کے حوالے سے بات چیت کی گئی تھی جو قطر میں امریکی ویزوں کے منتظر ہیں۔ یہ پیش رفت ان قانونی مشکلات کی عکاس ہے جن کا سامنا ان افراد کو ہے جو کابل سے امریکی انخلا کے چار سال بعد بھی غیر یقینی صورتحال کا شکار ہیں۔
