نئی دہلی سے روانہ ہونے والی سوئس انٹرنیشنل ایئرلائنز کی پرواز کو انجن میں خرابی کے باعث ٹیک آف کے دوران ہنگامی طور پر روک دیا گیا۔ ایئر بس اے 330 طیارے میں 228 مسافر، چار شیر خوار بچے اور عملے کے 13 ارکان سوار تھے۔
ایئرلائن انتظامیہ کے مطابق واقعہ 26 اپریل کو مقامی وقت کے مطابق رات ایک بجے کے فوراً بعد پیش آیا۔ پرواز ایل ایکس 147 کے انجن میں تکنیکی مسئلہ پیدا ہونے کے بعد عملے نے ٹیک آف منسوخ کرنے کا فیصلہ کیا اور حفاظتی اقدام کے طور پر طیارے کو خالی کرایا گیا۔
رپورٹس کے مطابق طیارہ رن وے پر رفتار پکڑ رہا تھا کہ اسی دوران انجن میں آگ بھڑک اٹھی۔ ہنگامی انخلا کے عمل کے دوران چار مسافر زخمی ہوئے جنہیں طبی امداد کے لیے ہسپتال منتقل کر دیا گیا، جبکہ عملے کا ایک رکن ٹخنے میں موچ آنے کے باعث زخمی ہوا۔
سوئس انٹرنیشنل نے واقعے کی تحقیقات کے لیے ایک ٹاسک فورس تشکیل دے دی ہے۔ ابتدائی طور پر چھ مسافروں کے زخمی ہونے کی اطلاع دی گئی تھی جسے بعد ازاں درست کر کے چار کر دیا گیا۔
اندررا گاندھی انٹرنیشنل ایئرپورٹ انتظامیہ نے واقعے کے بعد فوری طور پر ایمرجنسی نافذ کر دی تھی۔ ایئرپورٹ حکام کا کہنا ہے کہ اس واقعے کے باوجود رن وے پر فضائی آپریشن معمول کے مطابق جاری رہا اور پروازوں کا نظام متاثر نہیں ہوا۔
