واشنگٹن (رائٹرز) امریکی صدر ڈونلڈ ٹرمپ نے دعویٰ کیا ہے کہ ایران مذاکرات کا خواہاں ہے اور ایک معاہدے تک پہنچنے کے لیے تیار ہے۔ وائٹ ہاؤس میں ایک تقریب کے دوران گفتگو کرتے ہوئے صدر ٹرمپ نے کہا کہ ایران کے ساتھ معاملات بہتر انداز میں آگے بڑھ رہے ہیں اور ہم دیکھیں گے کہ مستقبل میں کیا پیش رفت ہوتی ہے۔
صدر ٹرمپ کا مزید کہنا تھا کہ ہم ایسے فریقین کے ساتھ بات چیت کر رہے ہیں جو معاہدے کے لیے انتہائی سنجیدہ دکھائی دیتے ہیں۔ انہوں نے واضح کیا کہ حتمی معاہدہ تبھی ممکن ہوگا جب اس کی شرائط امریکہ کے لیے تسلی بخش ہوں گی۔
دوسری جانب ایران نے اس بات کی تصدیق کی ہے کہ اسے امریکہ کی جانب سے ایک نئی تجویز موصول ہوئی ہے جس کا جائزہ لیا جا رہا ہے۔ باخبر ذرائع کے مطابق واشنگٹن اور تہران ایک ایسے ایک صفحے کے میمورنڈم کے قریب پہنچ چکے ہیں جس کا مقصد خلیج میں جاری کشیدگی کا خاتمہ ہے۔
ذرائع کا کہنا ہے کہ اس مجوزہ معاہدے میں جوہری پروگرام جیسے پیچیدہ معاملات کو فی الحال مؤخر کیا جا سکتا ہے تاکہ خطے میں جنگ کے خاتمے کو یقینی بنایا جا سکے۔
