فیصل آباد کے علاقے کھرڑیانوالہ میں گھریلو تنازع پر بیوی اور دو بیٹیوں کو قتل کرنے والے ملزم کو پولیس نے گرفتار کر لیا ہے۔ پولیس کے مطابق ملزم جاوید اقبال نے مائی مستانی روڈ پر واقع علی گارڈن میں فائرنگ کرکے اپنی 37 سالہ اہلیہ سائمہ بی بی، 17 سالہ بیٹی ام حبیبہ اور 13 سالہ عائشہ بی بی کو موت کے گھاٹ اتار دیا۔
افسوسناک واقعہ پیر کی شب اس وقت پیش آیا جب مقتولین اپنے کمرے میں سو رہی تھیں۔ ملزم جاوید اقبال واردات کے بعد موقع سے فرار ہوگیا جس سے علاقے میں خوف و ہراس پھیل گیا۔ ایک شہری کی جانب سے اطلاع ملنے پر ایس پی جڑانوالہ، ڈی ایس پی کھرڑیانوالہ اور ایس ایچ او نفری کے ہمراہ موقع پر پہنچے اور لاشوں کو تحویل میں لے کر پوسٹ مارٹم کے لیے ہسپتال منتقل کیا۔
تہرے قتل کے اس واقعے کا نوٹس لیتے ہوئے آر پی او سہیل اختر سکھیرا اور سی پی او فیصل آباد صاحبزادہ بلال عمر نے ملزم کی گرفتاری کے لیے خصوصی ٹیمیں تشکیل دینے کے احکامات جاری کیے۔ ایس پی جڑانوالہ کی نگرانی میں انویسٹی گیشن انچارج سب انسپکٹر گلزار سپرا نے مختلف مقامات پر چھاپے مارے اور کامیاب کارروائی کرتے ہوئے ملزم کو گرفتار کر لیا۔
پولیس نے ملزم کے قبضے سے آلہ قتل پستول بھی برآمد کر لیا ہے۔ اعلیٰ حکام نے مقتولین کے لواحقین کو انصاف کی فراہمی کی یقین دہانی کرائی ہے جبکہ ملزم کے خلاف مزید تفتیش کا عمل شروع کر دیا گیا ہے۔
