وزیرِ اعظم محمد شہباز شریف بدھ کی شب جدہ سے مدینہ منورہ پہنچ گئے۔ مدینہ کے گورنر شہزادہ سلمان بن سلطان بن عبدالعزیز آل سعود نے وزیرِ اعظم اور ان کے ہمراہ وفد کا استقبال کیا۔
وزیرِ اعظم نے مسجدِ نبوی میں حاضری دی اور ملکی ترقی، خوشحالی کے ساتھ ساتھ عالمی امن اور انسانیت کی فلاح کے لیے خصوصی دعائیں کیں۔ اس موقع پر وزیرِ اعظم اور ان کے وفد کے لیے روضہ رسول صلی اللہ علیہ و آلہ وسلم کے دروازے کھولے گئے، جہاں انہوں نے حاضری دی اور خراجِ عقیدت پیش کیا۔
سعودی عرب کا دورہ مکمل کرنے کے بعد وزیرِ اعظم شہباز شریف مدینہ منورہ سے دوحہ روانہ ہوں گے۔ قطری دارالحکومت میں وزیرِ اعظم کی امیرِ قطر شیخ تمیم بن حمد الثانی سے اہم ملاقات متوقع ہے، جس میں دوطرفہ تعلقات اور باہمی دلچسپی کے امور پر تبادلہ خیال کیا جائے گا۔
