سندھ رینجرز نے خفیہ اطلاع پر کارروائی کرتے ہوئے کراچی کے علاقے شاہ فیصل کالونی سے اسٹریٹ کرائم اور ڈکیتی کی متعدد وارداتوں میں ملوث ایک گینگ کے سرغنہ کو گرفتار کر لیا ہے۔ ترجمان رینجرز کے مطابق گرفتار ملزم کی شناخت نعمان احمد عرف پاپا ولد ظہور احمد کے نام سے ہوئی ہے جو پاپا گینگ کا سربراہ ہے۔ ملزم کے قبضے سے دو چھینے گئے موبائل فونز اور ایک موٹر سائیکل بھی برآمد کر لی گئی ہے۔
ترجمان نے بتایا کہ ملزم اپنے ساتھیوں کے ہمراہ شاہ فیصل کالونی، کورنگی، گلستان جوہر، ملیر اور ملحقہ علاقوں سمیت پنجاب کے مختلف حصوں میں ڈکیتی، اسٹریٹ کرائم، فائرنگ، پولیس مقابلوں اور موٹر سائیکل و موبائل فون چھیننے کی وارداتوں میں ملوث رہا ہے۔ ابتدائی تفتیش کے مطابق ملزم اب تک 200 سے 250 ڈکیتی کی وارداتوں، 40 سے 50 موٹر سائیکلیں، 300 سے 400 موبائل فونز اور 50 سے 60 لاکھ روپے نقدی لوٹنے کا اعتراف کر چکا ہے۔
گرفتار ملزم نے انکشاف کیا کہ وہ بھینس کالونی میں پولیس مقابلے کے دوران زخمی بھی ہوا تھا جبکہ شاہ فیصل کالونی میں پولیس مقابلے سے فرار ہونے میں کامیاب ہو گیا تھا۔ ملزم ایک عادی مجرم ہے جو اس سے قبل پنجاب میں بھی ڈکیتی کے الزامات میں گرفتار ہو چکا ہے۔ اس کے خلاف کراچی اور پنجاب کے مختلف تھانوں میں متعدد مقدمات درج ہیں۔
رینجرز ترجمان کا کہنا ہے کہ ملزم کے دو ساتھیوں کو پہلے ہی گرفتار کر کے جیل بھیجا جا چکا ہے جبکہ گروہ کے دیگر ارکان کی گرفتاری کے لیے کوششیں جاری ہیں۔ ملزم کو برآمد شدہ سامان سمیت مزید قانونی کارروائی کے لیے پولیس کے حوالے کر دیا گیا ہے۔
ترجمان رینجرز نے عوام سے اپیل کی ہے کہ ایسے عناصر کی اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر دیں۔ ترجمان نے یقین دہانی کرائی کہ اطلاع دینے والے کا نام صیغہ راز میں رکھا جائے گا۔
