فیفا نے سن دو ہزار چھبیس کے فٹ بال ورلڈ کپ کے لیے ایک اور نیا گیت جاری کر دیا ہے۔ الیومینیٹ کے عنوان سے جاری ہونے والے اس گیت میں فلسطینی نژاد چلی کی گلوکارہ الیانا اور کینیڈین آرٹسٹ جیسی ریئس نے اپنی آواز کا جادو جگایا ہے۔ یہ گیت فیفا کی جانب سے ٹورنامنٹ کے لیے جاری کردہ موسیقی کے سلسلے کی ایک کڑی ہے جسے انٹرنیٹ صارفین کی جانب سے بے حد سراہا جا رہا ہے۔
موسیقی کے ناقدین اور شائقین کا کہنا ہے کہ یہ گیت ورلڈ کپ کے ماحول سے مکمل مطابقت رکھتا ہے اور اس میں موجود عالمی تاثر اسے ٹورنامنٹ کا سب سے مقبول ترانہ بنا سکتا ہے۔ گیت میں آر اینڈ بی موسیقی کے ساتھ عربی دھنوں اور عالمی پاپ موسیقی کا امتزاج پیش کیا گیا ہے جس کا مرکزی خیال شناخت، اتحاد اور استقامت پر مبنی ہے۔
گریمی ایوارڈ یافتہ پروڈیوسر سرکٹ کی زیر نگرانی تیار کردہ اس گیت میں جیسی ریئس کی پر اثر آواز اور الیانا کی مخصوص عربی موسیقی کا سنگم نمایاں ہے۔ الیانا فیفا ورلڈ کپ کے آفیشل ساؤنڈ ٹریک میں شامل ہونے والی چند نمایاں عرب فنکاروں میں سے ایک ہیں۔
الیانا کی جانب سے سوشل میڈیا پر کی گئی حالیہ پوسٹس سے اشارہ ملتا ہے کہ وہ بارہ جون کو ٹورنامنٹ کی افتتاحی تقریب میں اپنی پرفارمنس پیش کریں گی۔ سن دو ہزار چھبیس کے ورلڈ کپ کے لیے تین افتتاحی تقریبات منعقد کی جائیں گی جن کا آغاز گیارہ جون کو میکسیکو سٹی سے ہوگا جبکہ بارہ جون کو ٹورنٹو اور لاس اینجلس میں تقریبات منعقد ہوں گی۔
الیانا سن دو ہزار تئیس کے کوچیلا فیسٹیول میں عربی زبان میں مکمل سیٹ پیش کرنے کے بعد سے عالمی سطح پر شہرت حاصل کر چکی ہیں۔ اس سے قبل فیفا نے شکیرا کے گائے ہوئے ورلڈ کپ کے آفیشل ترانے ڈائی ڈائی کا اعلان کیا تھا جس میں نائیجیریا کے آرٹسٹ برنا بوائے بھی شامل ہیں۔ یہ گیت چودہ مئی کو ریلیز کیا جائے گا۔
