صائمہ لگژری ہومز کی زمین غیر قانونی ہونے کا خدشہ

تعمیراتی شعبے میں شہرت کا عروج حاصل کرنے والے صائمہ بلڈرز اینڈ ڈیویلپرز گروپ کے روح رواں سلیم ذکی کے انتقال کے بعد ایک جانب قانونی ورثاء کے درمیان 100 ارب روپے سے زائد کی جائیداد تقسیم کی جنگ طول پکڑ گئی ہے تو دوسری جانب تعمیراتی منصوبوں کیلئے حاصل کی گئی اراضی بھی مشکوک ہوگئی ہے۔

شہر کے عین وسط میں 70 فیصد مکمل ہونے والے صائمہ گروپ کے منصوبے ” صائمہ لگژری ہومز” کی زمین کا حصول غیر قانونی قرار دیکر مختیار کار سب ڈویژن کورنگی نے پبلک پراپرٹی انکروچمنٹ ایکٹ 2010 کے سیکشن 3 کی رو سے سرکاری زمین پر غیر قانونی قبضہ قرار دیتے ہوئے صائمہ لگژری ہومز کے تعمیراتی مالکان کو بمعہ تمام اصل کاغزات (لیز، چالان، سائٹ پلان، اپروول آرڈر اور بلڈنگ پلان کی منظوری کی دستاویز کے ہمراہ طلب کرلیا۔ ذرائع کا کہنا ہے کہ ماضی میں اس گروپ نے سرکاری زمینوں کے حصول کیلئے مبینہ طور پر سیاسی اثرورسوخ استعمال کیا اور اخبارات اور الیکٹرانک میڈیا پر بھرپور اشتہاری مہم کے ذریعے عوام کو اپنے پراجیکٹس کی جانب راغب کیا۔ معتبر ذرائع کا کہنا ہے کہ صائمہ لگژری ہومز کے ساتھ ساتھ اس گروپ کے دیگر تعمیر شدہ اور زیر تعمیر منصوبوں میں بھی مبینہ طور پر کک بیک کا سہارا لیا گیا تاکہ الاٹیز کو ان پیچیدگیوں کی بھنک نہ پڑسکتی۔

مختیار کار آفس کے ذرائع کا کہنا ہے کہ معزز عدالت عالیہ کے سخت احکامات کی روشنی میں صائمہ لگژری ہومز کی تمام دستاویز کی از سر نو چھان بین کی جارہی ہے اور ابتدائی تحقیق سے معلوم ہوا ہے کہ سرکاری زمین کے حصول میں کئی شبہات پائے جارہے ہیں۔

ادھر صائمہ ہومز سمیت اس گروپ کے تحت دیگر منصوبوں میں بکنگ کرانے والے ہزاروں الاٹیز سخت تذبذب کے شکار ہیں کہ بڑے گروپ کی بظاہر اور بڑی ساکھ کو مد نظر رکھتے ہوئے اپنی زندگی بھر کی جمع پونجی داؤ پر لگ گئی ہے۔

واضع رہے کہ معزز عدالت عالیہ کے حکم پر نسلہ ٹاور سمیت شہر میں تعمیر کئی تعمیراتی منصوبوں کو غیر قانونی قرار دیتے ہوئے مسمار کرنے کا عمل شروع ہوچکا ہے۔

صائمہ گروپ جائیداد تنازعے میں ایک نیا موڑ آچکا ہے جس میں سلیم ذکی مرحوم کی صاحبزادی صائمہ جاوید نے اپنے بھائی ذیشان ذکی کے خلاف مبینہ دھوکہ دہی سے جائیداد پر قبضے کے درخواست دائر کردی ہے۔

ذرائع نے صائمہ لگژری ہومز کی زمین کے حصول، لیز، ٹرانسفر، سائٹ پلان میں جھول اور بے قاعدگیوں کے نتیجے میں شہر کے دیگر غیر قانونی منصوبوں کی طرح اس منصوبے کو بھی مسمار کئے جانے کا خدشہ ظاہر کیا ہے۔