600 جوتوں سے عالمی برانڈ تک: چینی کمپنی ‘اینٹا’ کے عروج کی دلچسپ کہانی

چین میں انیس سو اسی کی دہائی کے اواخر میں معاشی دروازے کھلنے کے بعد ابھرنے والے کاروباری افراد میں ڈنگ شیزونگ کا نام نمایاں ہے، جنہوں نے ہائی اسکول کی تعلیم ادھوری چھوڑ کر بیجنگ کا رخ کیا اور محض چھ سو جوتوں کے ساتھ اپنے سفر کا آغاز کیا۔

ڈنگ شیزونگ نے ابتدا میں اپنے ایک رشتہ دار کی فیکٹری کو استعمال کرتے ہوئے دیگر کمپنیوں کے لیے جوتے تیار کیے اور بعد ازاں اپنی ورکشاپ قائم کی۔ انیس سو اکیانوے میں صوبہ فوجیان کے شہر جن جیانگ سے شروع ہونے والا یہ چھوٹا سا منصوبہ آج چین کی سب سے بڑی اسپورٹس ویئر کمپنیوں میں سے ایک اینٹا کی شکل اختیار کر چکا ہے۔

ابتدا میں عالمی برانڈز کو سپلائی کرنے والی اینٹا نے وقت کے ساتھ ساتھ چین بھر میں دس ہزار سے زائد اسٹورز پر مشتمل ایک وسیع ریٹیل نیٹ ورک قائم کر لیا ہے۔ کمپنی نے ملٹی برانڈ حکمت عملی اپناتے ہوئے فِلا، ایمر اسپورٹس، آرکٹیرکس، سالومن اور ولسن جیسے عالمی ناموں کی ملکیت حاصل کی، جبکہ حال ہی میں پوما میں بھی حصص خریدے ہیں۔

کمپنی کی عالمی سطح پر بڑھتی ہوئی پہنچ کا اندازہ اس بات سے لگایا جا سکتا ہے کہ اینٹا نے لاس اینجلس کے علاقے بیورلی ہلز میں اپنا پہلا امریکی فلیگ شپ اسٹور کھول دیا ہے، جس سے اس نے نائیکی اور ایڈیڈاس جیسے مغربی برانڈز کے غلبے والے بازاروں میں براہ راست مقابلہ کرنے کا اعلان کیا ہے۔

صنعتی ماہرین کا کہنا ہے کہ اینٹا جیسی کمپنیوں نے مغربی فرموں کے ساتھ کام کر کے پیداواری صلاحیت کے ساتھ ساتھ ڈیزائن، لاجسٹکس اور برانڈنگ میں مہارت حاصل کی، جس نے انہیں عالمی عزائم پورے کرنے میں مدد دی۔

محفوظ قدم کے معنی رکھنے والی اینٹا اب چین سے باہر چار سو ساٹھ سے زائد اسٹورز چلا رہی ہے اور جنوب مشرقی ایشیا میں مزید توسیع کا ارادہ رکھتی ہے۔ اگرچہ کمپنی کو عالمی برانڈنگ اور مغربی حریفوں سے سخت مقابلے کا سامنا ہے، تاہم یہ خود کو عالمی ایتھلیٹک ویئر مارکیٹ میں ایک بڑے چیلنج کے طور پر منوانے کے لیے پرعزم ہے۔